पानटपरी चालकाचा भरदिवसा खून; तीन आरोपी अटकेत

नेर (Murder Case) : शहरातील काश्मीर नगर परिसरात भरदिवसा घडलेल्या खुनाच्या घटनेने परिसरात मोठी खळबळ उडाली आहे. पान टपरी व कोल्ड्रिंक व्यवसाय करणारे शेहेबाज हसन तसदीक हसन पठाण (४०), रा. काश्मीर नगर, नेर यांचा तीन युवकांनी चाकूने वार करून निर्घृण खून केला. ही घटना दुपारी सुमारे एक वाजण्याच्या सुमारास घडली.

सुमारे पंधरा दिवसांपूर्वी मृतकाच्या अल्पवयीन मुलीने काही युवकांकडून छेडछाड होत असल्याची तक्रार वडिलांकडे केली होती. त्यानंतर शेहेबाज यांनी संबंधित युवकांना समज देत मुलीला त्रास देऊ नये, असे बजावले होते. याच कारणावरून हा वाद चिघळल्याचे प्राथमिक तपासात समोर आले आहे. घटनेच्या दिवशी शेहेबाज आपली पान टपरी बंद करून मोटारसायकलने घरी जात असताना आरोपींनी त्यांना अडवले. ‘आम्हाला का समज देतोस’ असा जाब विचारत त्यांना दुचाकीवरून खाली ओढण्यात आले. त्यानंतर आरोपींनी चाकूने छाती व पोटावर वार करून त्यांना गंभीर जखमी केले. दरम्यान, त्यांचा भाऊ जावेद बचावासाठी धावला, मात्र तोपर्यंत शेहेबाज रक्ताच्या थारोळ्यात कोसळले होते. जखमी अवस्थेत त्यांना तातडीने नेर येथील शासकीय रुग्णालयात दाखल करण्यात आले. मात्र डॉक्टरांनी तपासणीअंती त्यांना मृत घोषित केले. या प्रकरणी जावेद यांच्या फिर्यादीवरून नेर पोलिसांनी मोहम्मद साहिल मोहम्मद इसराईल (रा. काजीपुरा), फैजान खान जमील खान उर्फ सोनू व उजेब खान एजाज खान (दोघे रा. पठाणपुरा, नेर) यांच्याविरुद्ध गुन्हा दाखल केला आहे. तिन्ही आरोपींना अटक करण्यात आली असून पुढील तपास ठाणेदार अनिल बेहेराणी करीत आहे.