स्थानिक स्वराज्य संस्था मतदार संघ निवडणूक; लातूर वगळता सर्वत्र शंभर टक्के मतदान!

लातूर (Latur Election) : लातूर धाराशिव बीड स्थानिक स्वराज्य संस्था मतदार संघात गुरुवारी (दि.18) लातूर मतदान केंद्र वगळता इतर सर्व मतदान केंद्रांवर शंभर टक्के मतदान झाले. सरासरी मतदान 99.49 टक्के इतके झाले. भाजपा महायुतीचे उमेदवार बसवराज पाटील व काँग्रेस महाआघाडीचे उमेदवार महेश देशमुख यांच्यात या निवडणुकीसाठी प्रमुख लढत होत आहे. दरम्यान या निवडणुकीत भाजपा महायुतीचा विजय निश्चित होईल, असा विश्वास भाजपा महायुतीचे उमेदवार बसवराज पाटील यांनी व्यक्त केला. 

लातूर धाराशिव बीड स्थानिक स्वराज्य संस्था मतदार संघात भाजपा महायुतीचे उमेदवारी बसवराज पाटील यांना तर काँग्रेस महाआघाडीचे उमेदवार महेश देशमुख यांना देण्यात आली. जवळपास पंधरा दिवस प्रचाराची रणधुमाळी सुरू होती. लातूर धाराशिव बीड या तिन्ही जिल्ह्यातील स्थानिक स्वराज्य संस्थांमधील सदस्य हे या निवडणुकीतील मतदार आहेत. विशेष म्हणजे बीड जिल्ह्यात जिल्हा परिषदेची निवडणूक झाली नसल्याने तेथे जिल्हा परिषद सदस्य मतदार नाहीत.

शनिवारी या (Latur Election) निवडणुकीसाठी जवळपास 29 मतदान केंद्रावर मतदान झाले. बीड जिल्ह्यात 11, धाराशिव जिल्ह्यात 8 तर लातूर जिल्ह्यात 10 मतदान केंद्रावर मतदान झाले. लातूर जिल्ह्यातील लातूर येथील मतदान केंद्रावर तीन पुरुष मतदारांनी व दोन महिला मतदारांनी अशा एकूण पाच मतदारांनी मतदान केले नाही. 88 पैकी केवळ 83 मतदान झाले. टक्केवारी 94.32 इतके मतदान लातूर केंद्रावर नोंदले गेले. उर्वरित सर्व मतदान केंद्रावर शंभर टक्के मतदान झाले. सरासरी मतदान 99.49 टक्के इतके झाले.

प्रचारातही बसवराज पाटलांची आघाडी 
लातूर-धाराशिव-बीड स्थानिक स्वराज्य संस्था मतदार संघात भाजपा व महायुतीचा एकतर्फी विजय निश्चित होता, मात्र काँग्रेस व महाआघाडीने महेश देशमुख यांना उमेदवारी दिल्याने या मतदारसंघात लढत झाली. मात्र बसवराज पाटील यांनी सुरुवातीपासूनच प्रचाराची रणधुमाळी कायम ठेवली. मतदान केंद्र असलेल्या प्रत्येक गावात जाऊन त्यांनी भाजपा व महायुतीच्या नेत्यांची व मतदारांची प्रत्यक्ष भेट घेत संवाद साधला. त्यांच्या प्रचारासाठी भाजपाच्या प्रदेशाध्यक्षांपासून अनेक मंत्री, आमदार यांनी मैदान सोडले नाही. या उलट काँग्रेस महाआघाडी उमेदवाराच्या प्रचाराची सुरुवात माजी मंत्री आमदार अमित देशमुख यांनी केली आणि प्रचाराची संपूर्ण धुरा उमेदवार महेश देशमुख यांनी त्याच्या स्थानिक महाआघाडीच्या पदाधिकाऱ्यांना घेऊन सांभाळली. मतदार संघात भाजपा व महायुतीचे संख्याबळ पाहता भाजपा महायुतीचा विजय निश्चित मानला जात आहे.