मालेवाड्यात आगीचे तांडव;आठ एकरातील मका झाला कोळसा

भिवापूर (Maize Crop Damage) : भिवापूर तालुक्यातील मालेवाडा येथे आग लागून आठ एकरातील मका पिक पूर्णतः जळून खाक झाल्याची घटना बुधवार दिनांक 15 एप्रिल रोजी उघडकीस आली. मालेवाडा येथील विलास दयाराम मेश्राम असे नुकसानग्रस्त शेतकऱ्याचे नाव असून त्यांनी भाडेपट्टीने गावातीलच एका शेतकऱ्याची शेती कसण्यासाठी घेतली होती.

मागील काही वर्षापासून या परिसरात रब्बी हंगामात चना पिकाला बुरशीजन्य आजाराची लागण होत असल्याने यावर्षी विलास दयाराम मेश्राम यांनी नवीन प्रयोग करीत मका पिकाची लागवड केली. पिक जोमात आल्याने सदर शेतकऱ्यांच्या चेहऱ्यावर आनंद होता मात्र आगीत मका पूर्ण त्यांच्यावर आर्थिक संकट कोसळले असून प्राथमिक अंदाज आठ ते नऊ लाख रुपयांचे नुकसान झाल्याची माहिती दैनिक देशोन्नतीशी बोलताना पीडित शेतकऱ्यांनी दिली आहे. दरम्यान आगीचे कारण गुलदस्तात असून काल 14 एप्रिल रोजी या शेतालगतच श्रीकांत इंगोले यांच्या शेतात आग लागली होती त्यामुळे तीच आज मेश्राम यांच्या शेतात लागून मका पीक जळाल्याची शक्यता व्यक्त होत आहे.