उपवर्गीकरणाच्या समर्थनार्थ बैठक घेतल्याने आपणास जिवे मारण्याची धमकी!

लातूर (MLA Sudhakar Bhalerao) : अनुसूचित 59 जातीसाठी अ, ब, क, ड उपवर्गीकरणाच्या न्याय्य हक्कांसाठी मागणी पार्श्वभूमीवर सर्वसमावेशक सामाजिक भूमिका व्यक्त करत असताना कांही समाज कंटकाच्या वतीने फोनद्वारे व सोशल मिडियावर एसएमएसद्वारे मला शिवीगाळ व जीवे मारण्याची वारंवार धमक्या देणे सुरू आहे. म्हणून माझ्या जिवीतास धोका निर्माण झाल्यामुळे मला तात्काळ पोलीस संरक्षण द्यावे, अशी मागणी माजी आमदार सुधाकर भालेराव यांनी लातूरच्या जिल्हाधिकारी व पोलीस अधीक्षकांकडे एका निवेदनाद्वारे केली केली. याबाबत लातूर येथे मंगळवारी पत्रकार परिषदेत बोलताना त्यांनी माजी मंत्री आमदार संजय बनसोडे व राजकुमार बडोले यांच्यावर थेट आरोप करीत त्यांच्या समर्थकांकडून अशा धमक्या आल्याचे म्हटले आहे.

दोन वेळा उदगीर विधानसभा मतदारसंघाचे आमदार राहिलेल्या सुधाकर भालेराव (MLA Sudhakar Bhalerao) यांनी सांगितले की, माझ्या सार्वजनिक जीवनात मी नेहमीच समाजातील वंचित, उपेक्षित, दुर्लक्षित व सामाजिकदृष्ट्या मागे राहिलेल्या घटकांना न्याय, समान संधी व संविधानिक अधिकार मिळावेत. या भूमिकेतून कार्य केले आहे. सुप्रिम कोर्टाच्या आदेशाने अनुसूचित जाती व जमातीसाठी उपवर्गीकरण मिळावे, असे भारतातील सर्वच राज्यांना निर्देष दिलेले आहेत. कांही राज्यांनी त्याची अमलबजावणी केली. त्याच धर्तीवर महाराष्ट्र राज्य सरकारने सुध्दा अ, ब, क, ड उपवर्गीकरण करावे.

या मागणीसाठी आपण लातूर येथे बैठक घेतल्यानंतर या बैठकीत आपण केलेल्या वक्तव्याचा विपर्यास करीत आपणास माजी मंत्री संजय बनसोडे व राजकुमार बडोले यांच्या समर्थकांकडून शिवीगाळ व धनक या येत असल्याचे त्यांनी या पत्रकार परिषदेत सांगितले. याबाबत आपण जिल्हाधिकारी व जिल्हा पोलीस अधीक्षकांना निवेदन देत पोलीस संरक्षणाची मागणी केल्याचे भालेराव म्हणाले. राज्याचे उपमुख्यमंत्री एकनाथ शिंदे यांच्या उपस्थितीत अहमदपूर येथे होणाऱ्या कार्यक्रमात माझ्यावर शाईफेक करण्याचे षडयंत्र रचल्याचा आरोप करीत याप्रकरणी सरकारने लक्ष घालावे अशी मागणी त्यांनी केली आहे.