जंतर-मंतर लाठीहल्ल्याच्या निषेधार्थ परभणी बंद; व्यापारी, सामाजिक संघटनांचा उत्स्फूर्त प्रतिसाद

वंचित बहुजन आघाडीची मोटारसायकल रॅली; प्रमुख बाजारपेठा बंद, चोख पोलिस बंदोबस्तात आंदोलन शांततेत पार

परभणी (Parbhani Bandh) : दिल्लीतील जंतर-मंतर येथे विद्यार्थ्यांवर झालेल्या कथित लाठीहल्ल्याच्या निषेधार्थ वंचित बहुजन आघाडीच्या वतीने शुक्रवारी परभणी जिल्हा बंदचे आवाहन करण्यात आले. या बंदला शहरातील व्यापारी, दुकानदार, विविध सामाजिक संघटना तसेच नागरिकांनी उत्स्फूर्त प्रतिसाद दिला. शहरातील प्रमुख बाजारपेठांतील अनेक दुकाने दिवसभर बंद राहिल्याने शहरात शुकशुकाटाचे चित्र पाहायला मिळाले.

बंदच्या (Parbhani Bandh) पार्श्वभूमीवर वंचित बहुजन आघाडीच्या पदाधिकारी व कार्यकर्त्यांनी शहरातून मोटारसायकल रॅली काढून व्यापारी व नागरिकांना बंदमध्ये सहभागी होण्याचे आवाहन केले. आंदोलनादरम्यान विद्यार्थ्यांवरील कथित लाठीहल्ल्याचा निषेध करण्यात आला. तसेच संबंधितांवर कठोर कारवाई करून विद्यार्थ्यांच्या मागण्यांकडे केंद्र सरकारने गांभीर्याने लक्ष द्यावे, अशी मागणी करण्यात आली.

कायदा व सुव्यवस्था अबाधित राहावी यासाठी पोलिस प्रशासनाने शहरात चोख बंदोबस्त तैनात केला होता. त्यामुळे संपूर्ण आंदोलन शांततेत पार पडले. यावेळी वंचित बहुजन आघाडीचे जिल्हाध्यक्ष प्रमोद कुटे, संदीप खाडे, शेख कलीम, मुजफ्फर खान, रंजीत मकरंद, गौतम भराडे, बापुराव मोरे, अशोक वायवल, अशोक आव्हाड, सचिन दत्तराव कांबळे, सय्यद नूर, प्रमोद अंभोरे, गणेश गाडे, एन. जी. खंदारे, यशवंत सोनवणे यांच्यासह आजी-माजी पदाधिकारी व कार्यकर्ते उपस्थित होते.

तसेच भीम आर्मी संविधान रक्षक दल मराठवाडाचे अध्यक्ष कचरू गोडबोले, रिपब्लिकन सेनेचे जिल्हाध्यक्ष महेंद्र सानके, जिल्हा संघटक राजू खरात, भीमशक्तीचे जिल्हाध्यक्ष सतीश भिसे, परभणी राजगृह ब्रिगेडचे सुधीर साळवे, सुधीर कांबळे, विश्वजीत वाघमारे, प्रदीप वावळे यांच्यासह भीम आर्मी, रिपब्लिकन सेना, भारतीय बौद्ध महासभा आणि विविध सामाजिक संघटनांचे पदाधिकारी व कार्यकर्ते मोठ्या संख्येने आंदोलनात सहभागी झाले.