लातूरचे घनकचरा व्यवस्थापनाचे टेंडर रद्द करा!

भाजपाचे नगरसेवक गणेश गवारे यांची मागणी

लातूर (Latur Waste Management) : लातूर शहरातील घनकचरा व्यवस्थापन टेंडरप्रमाणे होत नाही, हे लातूर महापालिकेने केलेल्या चौकशीत सिद्ध झाले आहे. तद्दवताच, टेंडर मधील अटी व शर्तींचे पालन न केल्याने कंत्राटदार कंपनी अशोक एंटरप्राइजेस (ठाणे) वर दोन कोटी दहा लाखांची दंडात्मक कारवाई महापालिकेने केली आहे. त्यामुळे लातूर महापालिकेने घनकचरा व्यवस्थापनाचे हे टेंडर रद्द करावे, अशी मागणी भाजपाचे तरुण नगरसेवक गणेश गवारे यांनी महापौरांकडे केली आहे. 

याबाबत गणेश गवारे यांनी महापौरांकडे लेखी निवेदन सादर केले आहे. शहरातील घनकचरा व्यवस्थापनाचे काम मंजूर टेंडरमधील अटी व शर्तींनुसार होत नसल्याचा गंभीर आरोप करत संबंधित कंत्राटदाराचे टेंडर तात्काळ रद्द करण्यात यावे, यासाठी येणाऱ्या सर्वसाधारण सभेच्या अजेंड्यावर हा विषय प्राधान्याने समाविष्ट करण्याची मागणीही नगरसेवक गणेश गवारे यांनी केली आहे.

गणेश गवारे यांनी निवेदनात म्हटले आहे की, शहरातील घनकचरा व्यवस्थापनात मोठ्या प्रमाणात अनियमितता होत असून टेंडरमधील अनेक अटींचे पालन केले जात नसल्याने नागरिकांना अस्वच्छता, दुर्गंधी आणि आरोग्याच्या समस्या सहन कराव्या लागत आहेत. संबंधित कंत्राटदाराचे काम पाहणाऱ्या प्रशासनाच्या अधिकाऱ्यांकडून दुर्लक्ष केले जात असल्याचा आरोपही त्यांनी केला. घनकचरा व्यवस्थापनाच्या कामाची तातडीने सखोल चौकशी करून दोषी आढळणाऱ्या कंत्राटदाराचे टेंडर रद्द करण्यात यावे, तसेच झालेल्या अनियमिततेची जबाबदारी निश्चित करून संबंधित अधिकाऱ्यांवरही कारवाई करण्यात यावी, अशी मागणी त्यांनी केली आहे.

ठोस निर्णय घ्या अन्यथा आंदोलन! 

लातूर शहरातील घनकचरा व्यवस्थापनाच्या गंभीर प्रश्नावर येणाऱ्या सर्वसाधारण सभेत सविस्तर चर्चा करून ठोस निर्णय घेण्यात यावा; अन्यथा नागरिकांच्या हितासाठी भारतीय जनता पार्टीकडून तीव्र लोकआंदोलन छेडण्यात येईल, असा इशाराही नगरसेवक गणेश गवारे यांनी दिला आहे.