लातूर पालिका आयुक्तपदी राहुल कुलकर्णी

लातूर (Rahul Kulkarni) : लातूर महानगरपालिकेच्या आयुक्त मानसी मीना यांच्या रजेमुळे रिक्त झालेल्या महापालिका आयुक्तपदी राज्य शासनाने आयएएस अधिकारी राहुल कुलकर्णी यांची नियुक्ती केली आहे. राहुल कुलकर्णी (Rahul Kulkarni) हे आपल्या पदाचा पदभार उद्या गुरुवारी येणार आहेत. लातूर महानगरपालिकेचे ते अठरावे आयुक्त आहेत. 

राज्य शासनाच्या सामान्य प्रशासन विभागाचे सहसचिव सुभाष उमराणीकर यांनी याबाबतचे पत्र जारी केले आहे. महाराष्ट्र राज्य सहकारी पणन महासंघाचे व्यवस्थापकीय संचालक असलेले कुलकर्णी यांच्या जागी आयएएस अधिकारी अशोक करंजकर यांची बदली करण्यात आल्याचे या पत्रात म्हटले आहे.

लातूर महानगरपालिका निर्माण झाल्यापासून आजपर्यंत फार कमी आयतानी आपला कार्यकाळ पूर्ण केला आहे. अल्पावधीतच अनेक आयुक्तांच्या बदल्या झाल्या आहेत. लातूर महापालिकेची आर्थिक परिस्थिती पाहता येणाऱ्या आयुक्तांपुढे महापालिकेचा कारभार चालवण्याचे मोठे आव्हान आहे. या आठवड्यातच महापालिकेच्या कर्मचाऱ्यांनी दोन महिन्यांचे वेतन थकल्यामुळे आंदोलन केले होते. कर्मचाऱ्यांच्या आंदोलनामुळे महापालिकेकडे कर्मचाऱ्यांच्या वेतनासाठी पैसा नसल्याचे पुन्हा एकदा स्पष्ट झाले आहे. महापालिकेची विस्कटलेली आर्थिक घडी बसविण्यासाठी आयुक्त राहुल कुलकर्णी (Rahul Kulkarni) कशा पद्धतीने कारभार करतात, याकडे लातूर शहरवासी यांचे लक्ष लागले आहे.