हिंगोली शेतकऱ्याच्या सतर्कतेमुळे हरणाच्या पाडसाचे प्राण वाचले

हिंगोली (Hingoli Deer Rescue) : कळमनुरी तालुक्यातील कोंढुर डिग्रस येथे २६ जून रोजी  हृदयस्पर्शी घटना घडली. शेतकरी गजाननराव पंतगे आपल्या शेतात हळदीची लागवड करीत असताना रानटी कुत्र्यांच्या एका कळपाने हरणाच्या पाडसावर हल्ला केला. मादी हरीण जीव वाचवून पळून गेले, मात्र पाडस कुत्र्यांच्या तावडीत सापडले. 

पेरणी करत असताना गजाननराव यांच्या ही बाब लक्षात आली. त्यांनी क्षणाचाही विलंब न करता मित्रांच्या मदतीने धाव घेऊन पाडसाला कुत्र्यांच्या तावडीतून सुखरूप सोडवले. त्यानंतर त्यांनी तातडीने प्राणी मित्र रामप्रसाद जाधव यांना याबत कळवले. दिवसभर पाडसाची काळजी घेतल्यानंतर रात्री त्याला (Hingoli Deer Rescue) हरणाच्या कळपात सोडून देण्यात आले. गजाननराव यांच्या समयसूचकतेमुळे आणि धाडसामुळे पाडसाचे प्राण वाचले, अशी भावना गावकऱ्यांनी व्यक्त केली. 

याबाबत बोलताना प्राणी मित्र रामप्रसाद जाधव म्हणाले, "पावसाळा सुरू झाल्याने शेतात चिखल साचतो. हरणाच्या पाडसांच्या पायाला चिखलाचे गोळे चिकटल्याने त्यांना पळणे अवघड होते. त्यामुळे पाडसे व हरणे अनेकदा रानटी कुत्र्यांच्या हल्ल्यात सापडतात. अशा वेळी नागरिकांनी सतर्क राहून वन्यजीवांचे संरक्षण करावे."  कोंढुर डिग्रस येथील या घटनेने वन्यजीवांप्रती माणुसकीचे दर्शन घडवले आहे.