हिंगोली (Hingoli CMEGP) : मुख्यमंत्री रोजगार निर्मिती कार्यक्रम (CMEGP) अंतर्गत हिंगोली जिल्ह्याने सन 2025-26 या आर्थिक वर्षात उल्लेखनीय कामगिरी नोंदवली आहे. राज्य शासनाच्या उद्योग विभागाचे विकास आयुक्त दीपेन्द्र सिंह कुशवाह यांनी जिल्हाधिकारी श्री. राहुल गुप्ता यांना पाठवलेल्या अभिनंदन पत्रातून ही बाब समोर आली आहे.
हिंगोली जिल्ह्याने दिलेल्या उद्दिष्टाच्या 149.67% पूर्तता करून राज्यात आघाडी घेतली आहे. युवक-युवतींना उद्योजकतेसाठी प्रोत्साहन देणे व स्थानिक पातळीवर स्वयंरोजगार निर्माण करणे हा या योजनेचा मुख्य हेतू आहे. ही योजना 1 ऑगस्ट 2019 पासून राज्यात कार्यान्वित आहे.
विकास आयुक्तांनी पत्रात नमूद केले आहे की, ही यशस्वी उद्दिष्टपूर्ती जिल्हाधिकाऱ्यांचे सक्षम नेतृत्व, यंत्रणेमधील प्रभावी समन्वय आणि कर्मचाऱ्यांचे नियोजनबद्ध प्रयत्न यामुळेच शक्य झाली. या उत्कृष्ट कामगिरीबद्दल त्यांनी जिल्हाधिकारी राहुल गुप्ता व त्यांच्या सर्व सहकारी अधिकारी-कर्मचाऱ्यांचे मनःपूर्वक अभिनंदन केले आहे.
दरम्यान, सन 2026-27 या आर्थिक वर्षासाठी (Hingoli CMEGP) हिंगोली जिल्ह्याला CMEGP अंतर्गत एकूण 1000 प्रकरणांचे उद्दिष्ट देण्यात आले आहे. जिल्हाधिकारी राहुल गुप्ता यांच्या नेतृत्वाखाली येत्या वर्षातही योजनेची प्रभावी अंमलबजावणी होऊन अधिकाधिक युवक-युवतींना स्वयंरोजगाराच्या संधी उपलब्ध होतील, असा विश्वासही विकास आयुक्तांनी व्यक्त केला आहे. जिल्ह्याच्या या कामगिरीमुळे स्थानिक तरुणांमध्ये उद्योजकतेबाबत नवचैतन्य निर्माण झाले आहे.
