हिंगोली पोलीस अधीक्षक कार्यालयातूनच सुरुवात, आता विनाहेल्मेट प्रवेश बंद

पोलीस अधीक्षक डॉक्टर श्रेणिक लोढा यांच्या आदेशानंतर प्रवेशद्वारा वर पोलिसांचा खडा पहारा

हिंगोली (Hingoli Helmet Mandatory) : रस्ते अपघातांचे प्रमाण कमी करावे आणि नागरिकांमध्ये हेल्मेट वापराबाबत जनजागृती व्हावी यासाठी हिंगोलीचे पोलीस अधीक्षक डॉक्टर श्रेणिक लोढा यांनी एक महत्त्वाचा निर्णय घेतला आहे. यापुढे हिंगोली जिल्हा पोलीस अधीक्षक कार्यालयात येणाऱ्या प्रत्येक दुचाकीस्वाराला हेल्मेट घालणे बंधनकारक करण्यात आले आहे.

या (Hingoli Helmet Mandatory) आदेशाची अंमलबजावणी तातडीने सुरू झाली आहे. पोलीस अधीक्षक कार्यालयाच्या मुख्य प्रवेशद्वारावर पोलीस कर्मचारी आणि शिपाई तैनात करण्यात आले आहेत. कार्यालयात येणाऱ्या प्रत्येक दुचाकीस्वाराची तपासणी करून हेल्मेट असणाऱ्यांनाच आत प्रवेश दिला जात आहे.  या नियमातून कोणालाही सूट देण्यात आलेली नाही. पोलीस दलातील कर्मचारी असो किंवा कामानिमित्त येणारा सामान्य नागरिक, सर्वांनाच हा नियम लागू आहे. ज्यांच्याकडे हेल्मेट नाही अशा दुचाकीस्वारांना आपले वाहन कार्यालयापासून सुमारे 500 मीटर अंतरावर उभे करून पायी कार्यालयापर्यंत यावे लागत आहे.

सामान्य नागरिकांवर कारवाई करण्याऐवजी पोलीस दलाने स्वतःच्या कार्यालया पासूनच या शिस्तीला सुरुवात केल्याने नागरिकांमधून समाधान व्यक्त केले जात आहे. पोलीस अधीक्षक श्रेणिक लोढा यांच्या या निर्णयामुळे 'कायद्याचे पालन आधी आम्हीच करतो' हा संदेश जनतेपर्यंत गेला आहे. त्यांच्या या शिस्तप्रिय आणि जनजागृतीपर उपक्रमाचे हिंगोलीतील नागरिक आणि कार्यालयात येणारे अभ्यागत सर्व स्तरातून कौतुक करत आहेत.