हिंगोली जिल्ह्यात विजांच्या कडकडाटासह मेघगर्जनेचा इशारा, नागरिकांना सतर्कतेचे आवाहन

हिंगोली (Hingoli Heavy Rain) : भारतीय हवामान विभागाने हिंगोली जिल्ह्यासाठी विजांच्या कडकडाटासह मेघगर्जनेचा इशारा जारी केला आहे. जिल्ह्यात पुढील काही तासांत वातावरणात बदल होऊन ढगांचा गडगडाट आणि विजा चमकण्याची शक्यता वर्तवण्यात आली आहे. सध्या हिंगोली उप-जिल्ह्यात अंशतः ढगाळ वातावरण असून तापमान 35 अंश सेल्सिअस नोंदवले गेले आहे. पश्चिम-वायव्य दिशेने ताशी 10 किलोमीटर वेगाने वारे वाहत आहेत. उद्या जिल्ह्यात कमाल तापमान 42 अंश तर किमान 30 अंश सेल्सिअसपर्यंत जाण्याचा अंदाज हवामान विभागाने व्यक्त केला आहे.

या पार्श्वभूमीवर जिल्हा प्रशासनाने नागरिकांना सतर्क राहण्याचे आवाहन केले आहे. (Hingoli Heavy Rain) वीज चमकत असताना नागरिकांनी झाडाखाली, मोकळ्या शेतात किंवा उंच ठिकाणी थांबू नये. शक्यतो पक्क्या घरात किंवा सुरक्षित इमारतीत आश्रय घ्यावा. शेतकऱ्यांनी वीज आणि गडगडाट सुरू असताना शेतातील कामे टाळावीत. तसेच विजेचे खांब, मोबाईल टॉवर आणि धातूच्या वस्तूंपासून दूर राहावे.

नागरिकांनी अफवांवर विश्वास न ठेवता केवळ स्थानिक शासकीय यंत्रणा, तलाठी आणि ग्रामसेवक यांच्याकडून देण्यात येणाऱ्या अधिकृत सूचनांचेच पालन करावे असे आवाहन करण्यात आले आहे. वीज पडण्याच्या थेट सूचना मिळवण्यासाठी नागरिकांनी हवामान विभागाचे 'दामिनी लाइटनिंग' मोबाइल अॅप वापरावे. गरज नसल्यास प्रवास टाळावा आणि विजेच्या तारा तुटलेल्या आढळल्यास तात्काळ प्रशासनाला कळवावे.