एक मे महाराष्ट्र दिनी हिंगोली येथे चेस क्लबच्या वतीने भव्य बुद्धिबळ स्पर्धेचे आयोजन करण्यात आले होते.
हिंगोली (Hingoli Chess Tournament) : एक मे महाराष्ट्र दिनी हिंगोली येथे चेस क्लबच्या वतीने भव्य बुद्धिबळ स्पर्धेचे आयोजन करण्यात आले होते. या स्पर्धेला संपूर्ण राज्यभरातून मोठ्या प्रमाणात खेळाडूंनी सहभाग नोंदविला. ज्यामध्ये अहिल्यानगर येथील इंद्रजीत महेंद्रकर याने प्रथम क्रमांकाचे चषक पटकाविले.
हिंगोली येथील चेस क्लबच्या वतीने एक मे रोजी महावीर भवन येथे भव्य बुद्धिबळ स्पर्धेचे आयोजन करण्यात आले होते. या स्पर्धेचे उद्घाटन राज्यसभेचे खासदार रामराव वडकुते व जिल्हाधिकारी राहुल गुप्ता यांच्या हस्ते करण्यात आले. स्पर्धेमध्ये हिंगोली जिल्ह्यासह संपूर्ण महाराष्ट्रातून मोठ्या संख्येने खेळाडूंनी सहभाग नोंदविला.
दिवसभर चाललेल्या या स्पर्धेत प्रथम क्रमांक 12 हजार रुपये व चषक अहिल्यानगर येथील इंद्रजीत महेंद्रकर याने पटकावला तर द्वितीय पारितोषिक 7 हजार रुपये व चषक आशिष चौधरी व तृतीय पारितोषिक 4 हजार रुपये व चषक चंद्राणी श्लोक हिने पटकावला.
स्पर्धेच्या आयोजनाकरिता संचालिका ऋतुजा पांडे, प्रणव पांडे यांनी परिश्रम घेतले. या स्पर्धेकरिता नांदेड, पुणे, हैदराबाद येथून पंच उपस्थित होते.