Hingoli District: मंत्रीमंडळाच्या बैठकीत हिंगोलीसह जालना, पालघर, बीड, धुळे, परभणी या जिल्ह्यांमध्ये आकांक्षित जिल्हा व तालुका कार्यक्रमाचा विस्तार करण्यात येणार आहे.
मंत्रि मंडळाच्या बैठकीत घेतला निर्णय
हिंगोली (Hingoli District) : आकांक्षित जिल्हा व आकांक्षित तालुका कार्यक्रमाचा विस्तार करण्याचा निर्णय घेण्यात आला आहे. त्यानुसार या कार्यक्रमात *हिंगोली*, जालना, पालघर, बीड, धुळे व परभणी या सहा जिल्ह्यांचा समावेश करण्यास मान्यता देण्यात आली आहे. राज्याच्या प्रादेशिक संतुलित विकासाला चालना देण्याकरिता, आकांक्षित जिल्हा व तालुका कार्यक्रमाचा राज्य योजनेंतर्गत विस्तार करण्याबाबत यंदाच्या अर्थसंकल्पात घोषणा केली आहे.
त्यानुसार नीति आयोगाच्या आकांक्षित जिल्हा कार्यक्रमांतर्गत यापूर्वीच्या ४ जिल्ह्यांसह आता त्यामध्ये राज्य शासनाच्या विस्तार कार्यक्रमांतर्गत नव्याने ६ जिल्ह्यांची निवड करण्यास मान्यता देण्यात आली आहे. त्याचबरोबर सध्याच्या २७ आकांक्षित तालुक्यांव्यतिरिक्त नवीन १५० तालुक्यांची निवड करण्यास मान्यता देण्यात आली. यामुळे या १० जिल्ह्यातील ७७ आकांक्षित तालुक्यांसह राज्यातील अन्य जिल्ह्यातील १०० आकांक्षित अशा १७७ तालुक्यांमध्ये हा कार्यक्रम राबवण्यात येणार आहे.