हर्षवर्धन सपकाळ यांच्या वक्तव्यावरून भाजप आक्रमक; उद्या जिल्हाभर निदर्शने

चिखली (Harsh Vardhan Sapkal) : नाशिक जिल्ह्यातील चांदवड येथे महाविकास आघाडीतर्फे आयोजित कांदा उत्पादक शेतकऱ्यांच्या मोर्चात महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केलेल्या वक्तव्यावरून राज्यातील राजकीय वातावरण तापले असून, भारतीय जनता पक्षाने या वक्तव्याचा तीव्र निषेध नोंदवला आहे. या पार्श्वभूमीवर भाजपाने बुलढाणा जिल्ह्यात उद्या विविध ठिकाणी निदर्शने करण्याची घोषणा केली आहे.

चिखली येथे छत्रपती शिवाजी महाराज पुतळा चौकात भाजपातर्फे निषेध आंदोलन करण्यात आले. यावेळी चिखली विधानसभा मतदारसंघाच्या आमदार श्वेता महाले पाटील यांच्यासह भाजपाचे पदाधिकारी व कार्यकर्ते उपस्थित होते. कार्यकर्त्यांनी घोषणाबाजी करत सपकाळ यांच्या वक्तव्याचा निषेध व्यक्त केला. यावेळी बोलताना आमदार श्वेता महाले पाटील यांनी पंतप्रधान नरेंद्र मोदी आणि मुख्यमंत्री देवेंद्र फडणवीस यांच्याविषयी वापरण्यात आलेली भाषा अयोग्य असल्याचे सांगितले. सार्वजनिक जीवनातील व्यक्तींविषयी बोलताना राजकीय मर्यादा आणि सभ्यता पाळली जाणे आवश्यक असल्याचे त्यांनी नमूद केले. तसेच काँग्रेस पक्षाने या प्रकरणी भूमिका स्पष्ट करावी, अशी मागणीही त्यांनी केली.

दरम्यान, भाजपाच्या वतीने दि. २८ मे २०२६ रोजी सकाळी १० वाजता जिल्ह्यातील विविध मंडळ स्तरांवर स्थानिक काँग्रेस कार्यालयांसमोर निदर्शने करण्यात येणार असल्याची माहिती पक्ष पदाधिकाऱ्यांनी दिली. कार्यकर्त्यांनी मोठ्या संख्येने उपस्थित राहावे, असे आवाहनही करण्यात आले आहे. या (Harsh Vardhan Sapkal) प्रकरणामुळे राज्यातील राजकीय वातावरण पुन्हा तापले असून, आगामी काळात या मुद्द्यावरून आरोप-प्रत्यारोप आणखी तीव्र होण्याची शक्यता व्यक्त होत आहे.