उदगीरमध्ये स्कुटीच्या डिकीतून ५० हजारांचा प्रतिबंधित गुटखा जप्त; एका तरुणाविरुद्ध गुन्हा दाखल

उदगीर (Gutkha Seizure) : उदगीर शहर पोलिसांनी प्रतिबंधित गुटखा व तंबाखुजन्य पदार्थांविरोधात कारवाई करत सुमारे ५० हजार ९२१ रुपयांचा मुद्देमाल जप्त केला असून एका तरुणाविरुद्ध गुन्हा दाखल केला आहे.

पोलिसांनी दिलेल्या माहितीनुसार, पोलीस अंमलदार सतीश भानुदास पवार (वय ४१) यांनी दिलेल्या फिर्यादीवरून शेख शोयब हुसेनसाब (वय २०, मूळ रा. मादलापूर, ता. उदगीर, सध्या हनुमान नगर, सिग्नल क्र. २, उदगीर) याच्याविरुद्ध गुन्हा क्रमांक २६८/२०२६ नोंद करण्यात आला आहे.

दि. २९ जून २०२६ रोजी रात्री ८.४५ वाजण्याच्या सुमारास छत्रपती शिवाजी महाराज चौक ते शाहू चौक मार्गावरील स्टार पानशॉप अँड कोल्ड्रिंक्स परिसरात आरोपी हा एमएच-२४-झेड-५२८६ क्रमांकाच्या काळ्या रंगाच्या स्कुटीच्या डिकीत महाराष्ट्रात विक्रीस प्रतिबंधित असलेला सुगंधित पान मसाला व तंबाखुजन्य गुटखा बाळगून असल्याचे आढळून आले. पोलिसांनी कारवाई करून ५०,९२१ रुपयांचा प्रतिबंधित माल जप्त केला.

या प्रकरणी आरोपीविरुद्ध भारतीय न्याय संहिता (BNS) कलम १२३, २२३, २७४, २७५ तसेच अन्न सुरक्षा व मानके अधिनियम, २००६ च्या कलम ५९ अन्वये गुन्हा दाखल करण्यात आला आहे.

पोलिसांच्या माहितीनुसार, अन्न सुरक्षा आयुक्त, अन्न व औषध प्रशासन, महाराष्ट्र राज्य यांनी १६ जुलै २०२५ रोजी जारी केलेल्या अधिसूचनेनुसार राज्यात प्रतिबंधित असलेल्या पान मसाला व तंबाखुजन्य पदार्थांची माहिती असूनही आरोपीने स्वतःच्या आर्थिक फायद्यासाठी त्यांची वाहतूक व बाळगणूक करून शासनाच्या आदेशाचे उल्लंघन केले.

ही कारवाई उदगीर शहर पोलीस ठाण्याचे प्रभारी अधिकारी यांच्या मार्गदर्शनाखाली करण्यात आली. या प्रकरणाचा पुढील तपास पोलीस उपनिरीक्षक रेडेकर करीत आहेत.