अफवांमुळे पेट्रोल पंपांवर गर्दी; नागरिकांना शांत राहण्याचे आवाहन

नागपूर (Fuel Stock) :  शहरात पेट्रोल तुटवड्याच्या अफवांदरम्यान नागरिकांमध्ये निर्माण झालेल्या संभ्रमावर प्रशासनाने स्पष्ट भूमिका मांडली आहे. जिल्हाधिकारी विपिन इटनकर यांनी नागपुरात पेट्रोलचा पुरेसा साठा उपलब्ध असून घाबरण्याची कोणतीही गरज नसल्याचे सांगितले.

गेल्या काही तासांत काही पेट्रोल पंपांवर दिसून आलेली गर्दी ही अफवांमुळे झालेली पॅनिक बायिंग असल्याचे प्रशासनाने नमूद केले. नागरिकांनी घाबरून पेट्रोल साठवण्याचा प्रयत्न करू नये, तसेच अनावश्यक गर्दी टाळावी, असे आवाहन करण्यात आले आहे.

प्रशासनाने परिस्थिती पूर्णपणे नियंत्रणात असल्याचे स्पष्ट करत सर्व आवश्यक उपाययोजना सुरू असल्याची माहिती दिली. तसेच पेट्रोल पुरवठा सुरळीत सुरू असून, क्रेडिट लिमिट संदर्भात कोणतीही अडचण नसल्याचेही सांगण्यात आले.

दरम्यान, इंडस्ट्रीसाठी सुमारे ५० टक्के निर्बंध लागू करण्यात आले असले तरी घरगुती गॅस सिलेंडरच्या पुरवठ्यावर कोणताही परिणाम होणार नसल्याचे स्पष्ट करण्यात आले आहे.

अफवा पसरवणाऱ्यांवर कडक कारवाई करण्यात येईल, असा इशाराही प्रशासनाने दिला आहे. नागरिकांनी अफवांवर विश्वास न ठेवता शांतता राखावी आणि अधिकृत माहितीवरच विश्वास ठेवावा, असे आवाहन करण्यात आले.

सध्या संपूर्ण परिस्थितीवर प्रशासनाचे बारकाईने लक्ष असून, कोणतीही अडचण उद्भवू नये यासाठी यंत्रणा सतत कार्यरत आहे.