मुख्यमंत्री देवेंद्र फडणवीस आणि सांस्कृतिक कार्यमंत्री आशिष शेलार यांनी थेट दुचाकीवरून विधान भवन गाठत सर्वांचे लक्ष वेधून घेतले.
मुंबई (Fuel Saving) : मुख्यमंत्री देवेंद्र फडणवीस आणि सांस्कृतिक कार्यमंत्री आशिष शेलार यांनी थेट दुचाकीवरून विधान भवन गाठत सर्वांचे लक्ष वेधून घेतले. त्यांच्या या अनोख्या प्रवेशामुळे राजकीय वर्तुळात तसेच सोशल मीडियावर मोठी चर्चा रंगली आहे.
पंतप्रधान नरेंद्र मोदी यांनी नुकतेच देशवासीयांना इंधन बचतीचे आवाहन केले होते. त्याला सकारात्मक प्रतिसाद देत मुख्यमंत्री फडणवीस यांनी हा अभिनव निर्णय घेतल्याचे सांगितले जात आहे.
मुख्यमंत्री स्वतः Royal Enfield Classic 350 ही दुचाकी चालवत विधान भवनात दाखल झाले. त्यांच्या सोबत आशिष शेलार यांनीही दुचाकीवरून प्रवास करत सहभाग नोंदवला. विशेष म्हणजे, मुख्यमंत्र्यांच्या सुरक्षेसाठी तैनात असलेला ताफाही यावेळी दुचाकींवरूनच हालचाल करताना दिसून आला, ज्यामुळे हा संपूर्ण प्रवास अधिकच चर्चेचा विषय ठरला.
सध्या अनेक मंत्री आणि आमदार इलेक्ट्रिक वाहनांकडे वळत असताना, मुख्यमंत्र्यांनी दुचाकीचा वापर करून एक वेगळा पर्याय समोर ठेवला आहे. मुंबईतील वाढती वाहतूक कोंडी आणि इंधनाचा अपव्यय लक्षात घेता दुचाकी हा अधिक परिणामकारक पर्याय ठरू शकतो, असा संदेश या कृतीतून देण्यात आला.
राज्याच्या सर्वोच्च पदावरील व्यक्तीने इतक्या साध्या पद्धतीने प्रवास केल्यामुळे सामान्य नागरिकांमध्ये इंधन बचतीबाबत जागरूकता वाढण्यास मदत होईल, असे मत व्यक्त केले जात आहे. कडेकोट सुरक्षा व्यवस्था असूनही मुख्यमंत्री फडणवीस यांनी हेल्मेट घालून व सर्व वाहतूक नियमांचे पालन करत हा प्रवास पूर्ण केला.
दरम्यान, मुख्यमंत्र्यांच्या या ‘रॉयल’ एन्ट्रीचे फोटो आणि व्हिडिओ सध्या सोशल मीडियावर मोठ्या प्रमाणात व्हायरल होत असून, यावरून विविध प्रतिक्रिया उमटत आहेत. काहींनी या उपक्रमाचे कौतुक केले आहे, तर काहींनी यामागील संदेशावर चर्चा सुरू केली आहे.