गोरेगावात डिझेल-पेट्रोल टंचाईच्या निषेधार्थ पंतप्रधानांचा प्रतीकात्मक पुतळा दहन

गोरेगाव (Goregaon Diesel-Petrol Shortage) : डिझेल- पेट्रोलच्या वाढत्या महागाई आणि निर्माण झालेल्या तीव्र टंचाईच्या निषेधार्थ क्रांतिकारी शेतकरी संघटनेच्या वतीने 19 मे  रोजी गोरेगाव येथील चौफुली परिसरात पंतप्रधान नरेंद्र मोदी यांचा प्रतिकात्मक पुतळा जाळून तीव्र आंदोलन छेडण्यात आले. शेतकरी व नागरिक मोठ्या संख्येने या आंदोलनात सहभागी झाले होते. देशात डिझेल-पेट्रोलचे दर गगनाला भिडले असून त्यातच पंपावर तासन्तास रांगेत उभे राहूनही इंधन मिळत नसल्याने सर्वसामान्य नागरिक व शेतकरी वर्ग हैराण झाला आहे. शासनाच्या चुकीच्या धोरणांमुळेच ही परिस्थिती ओढवल्याचा आरोप आंदोलकांनी यावेळी केला. 

पेरणीपूर्व मशागत, फवारणी, तसेच शेतीला पाणीपुरवठा करण्यासाठी डिझेल अत्यावश्यक आहे. मात्र, पंपावर डिझेल उपलब्ध होत नसल्याने शेतीची कामे ठप्प झाली असून याचा थेट परिणाम खरीप हंगामावर होण्याची भीती शेतकऱ्यांनी व्यक्त केली. यामुळे ग्रामीण भागात संतापाची लाट उसळली आहे.

क्रांतिकारी शेतकरी संघटनेने शासनाला तातडीचा इशारा दिला आहे. देश चालवणाऱ्यांनी तात्काळ ठोस उपाययोजना करून नागरिकांना आणि विशेषतः शेतकऱ्यांना सुरळीतपणे डिझेल-पेट्रोल उपलब्ध करून द्यावे, अशी मागणी संघटनेने केली आहे. अन्यथा येत्या काळात राज्यभर तीव्र आंदोलन छेडले जाईल आणि मोठा जनआक्रोश उसळल्याशिवाय राहणार नाही, असा इशाराही यावेळी देण्यात आला. (Goregaon Diesel-Petrol Shortage) आंदोलनादरम्यान शेतकरी व नागरिकांनी शासनाच्या विरोधात जोरदार घोषणाबाजी करत आपला संताप व्यक्त केला. पोलिसांनी परिस्थितीवर लक्ष ठेवून होतो.