पावसातही भक्तीचा ओघ अखंड; वयोवृद्ध वारकऱ्यांची घेतली विशेष काळजी

हिंगोली (Elderly Warkaris) : आषाढी एकादशीच्या पार्श्वभूमीवर पंढरपूरकडे निघालेल्या दिंड्यांचा ओघ सुरूच असून, वाशिम जिल्ह्यातून विठुरायाच्या दर्शनासाठी निघालेली श्री संत नामदेव महाराज दिंडी शुक्रवारी (३ जुलै) हिंगोली शहराजवळील नर्सी फाटा येथे दाखल झाली. गेल्या दोन दिवसांपासून सुरू असलेल्या मुसळधार पावसातही वारकऱ्यांची विठ्ठलनामाचा गजर करत पायी वाटचाल सुरूच होती.

नर्सी फाटा परिसरात दुपारपासून जोरदार पाऊस सुरू असल्याने दिंडीतील वयोवृद्ध, महिला आणि लहान मुलांची गैरसोय होऊ नये, यासाठी दिंडीप्रमुखांनी महत्त्वाचा निर्णय घेतला. रस्त्यावरून पायी चालणे कठीण झाल्याने ७० वर्षांवरील सुमारे २५ ते ३० वयोवृद्ध वारकऱ्यांना दिंडीसोबत असलेल्या ट्रॅक्टर-ट्रॉली आणि इतर वाहनांमध्ये सुरक्षितपणे बसविण्यात आले.

दुसरीकडे, तरुण वारकऱ्यांनी मात्र पावसाची पर्वा न करता टाळ-मृदुंगाच्या गजरात आणि 'पुंडलिक वरदा हरी विठ्ठल' या जयघोषात आपली पायी वाटचाल कायम ठेवली. प्रतिकूल हवामानातही त्यांच्या भक्तिभावात कोणतीही कमी दिसून आली नाही.

दिंडीतील सेवेकऱ्यांनी वारकऱ्यांसाठी तातडीने गरम चहा व फराळाची व्यवस्था केली. तसेच नर्सी फाटा परिसरातील स्थानिक नागरिकांनीही वारकऱ्यांना मोलाचे सहकार्य केले. काहींनी आपल्या दुकानांचे शेड उघडे करून दिले, तर काहींनी पिण्याच्या पाण्याची व्यवस्था करून सेवाभाव जपला.

पाऊस, ऊन किंवा वारा यांची पर्वा न करता विठ्ठल भेटीची आस मनात बाळगून वारकरी पंढरपूरच्या दिशेने मार्गक्रमण करत आहेत. वाशिमहून निघालेली ही दिंडी येत्या चार दिवसांत पंढरपुरात दाखल होईल, असा विश्वास दिंडीचालकांनी व्यक्त केला. प्रतिकूल परिस्थितीतही एकमेकांना साथ देत, वयोवृद्धांची काळजी घेत पुढे जाण्याची वारकरी परंपरा पुन्हा एकदा या प्रवासातून अधोरेखित झाली.