गोरेगावात डिझेलसाठी किरकोळ कारणावरून पेट्रोल पंपावर वादावादी

हिंगोली (Diesel Shortage) : सेनगाव तालुक्यातील गोरेगाव येथील एका पेट्रोल पंपावर डिझेल मिळविण्यासाठी लागलेल्या रांगेत किरकोळ कारणावरून वादावादी होऊन भांडणतंट्याची घटना घडली. ही घटना दि. २२ मे रोजी रात्री १० वाजण्याच्या सुमारास घडली. गोंधळ वाढत असताना पोलिसांनी वेळीच घटनास्थळी धाव घेतल्याने परिस्थिती नियंत्रणात आली आणि शांतता निर्माण झाली. काही काळ डिझेल विक्री थांबवून गर्दीला पांगवण्यात आले होते.

पंतप्रधान नरेंद्र मोदी यांच्या आवाहनानंतर पेट्रोल-डिझेल तुटवड्याच्या अफवेमुळे विविध पेट्रोल पंपांवर विशेषतः डिझेलसाठी मोठ्या प्रमाणात रांगा लागत असल्याचे चित्र आहे. वाहन वाहतूक आणि दळणवळण व्यवस्था मोठ्या प्रमाणात डिझेल इंधनावर अवलंबून असल्याने वाहनधारकांकडून डिझेल साठवण्याकडे कल वाढला आहे.

ग्रामीण भागात सध्या शेती मशागतीची कामे सुरू असल्याने ट्रॅक्टरसाठी डिझेलची मागणी मोठ्या प्रमाणात वाढली आहे. गोरेगाव येथील संबंधित पेट्रोल पंपावर सर्वांना डिझेल उपलब्ध करून देण्याचा प्रयत्न पंप चालकांकडून केला जात असला तरी वाढत्या गर्दीमुळे लाईनमध्ये पुढे-मागे होणे, नंबर लावण्यावरून किरकोळ वाद निर्माण होत आहेत.

अशाच प्रकारे २२ मे रोजी रात्री डिझेल वितरण सुरू असताना अचानक किरकोळ कारणावरून वादावादी झाली आणि त्याचे रूपांतर भांडणतंट्यात झाले. परिस्थिती चिघळत असताना पोलिस जमादार राठोड हे पोलिस कुमक घेऊन तातडीने घटनास्थळी दाखल झाले. त्यांच्या हस्तक्षेपामुळे वाद आटोक्यात आला.

यावेळी पोलिस उपनिरीक्षक निलेश लेनगुळे यांनी नागरिकांना शिस्त पाळण्याचे आवाहन केले. काही वेळासाठी डिझेल विक्री थांबवून गर्दी कमी करण्यात आली. त्यानंतर पुन्हा इंधन वितरण पूर्ववत सुरू करण्यात आल्याचे वृत्त आहे.