भंडाऱ्यात चिमुरडीवर अत्याचार; सराईत आरोपीला अटक, जामिनावर सुटल्यानंतर पुन्हा थरकाप उडवणारा गुन्हा!

भंडारा : भंडारा शहरातील एका साडेतीन वर्षीय चिमुरडीवर अंगणवाडीच्या परिसरात झालेल्या अमानुष लैंगिक अत्याचाराच्या घटनेने संपूर्ण जिल्हा हादरला आहे. या प्रकरणातील आरोपीला पोलिसांनी तात्काळ अटक केली असून, धक्कादायक बाब म्हणजे याच आरोपीवर यापूर्वीही अशाच स्वरूपाचे दोन गुन्हे दाखल असून ते न्यायालयात प्रलंबित आहेत. त्यानंतरही तो डिसेंबर महिन्यात जामिनावर बाहेर आला होता आणि आता पुन्हा त्याच्यावर गंभीर स्वरूपाचा गुन्हा दाखल झाला आहे.

प्राथमिक माहितीनुसार, पीडित चिमुरडी अंगणवाडीत गेली होती. दुपारच्या सुमारास ती शौचालयासाठी गेली. मात्र, अंगणवाडीचे शौचालय रस्ता ओलांडून दुसऱ्या बाजूला असल्याने याच संधीचा फायदा घेत आरोपीने तिला गाठले. बाथरूममध्ये नेऊन आतून कडी लावून तिच्यावर अत्याचार केल्याचा आरोप आहे.

या वेळी चिमुरडीचा आक्रोश तिच्या भावाच्या कानावर पडला. अंगणवाडीच्या शेजारीच घर असल्याने त्याने तातडीने आईला बोलावले. आईने घटनास्थळी धाव घेतली असता बाथरूम आतून बंद होते. दरवाजा उघडल्यानंतर चिमुरडी भयभीत अवस्थेत आढळून आली, तर आरोपी आतच होता. त्यानंतर आरोपीने स्वतःलाच दुखापत करून घेतल्याची माहिती समोर आली. पीडितेला तात्काळ जिल्हा शासकीय रुग्णालयात दाखल करण्यात आले असून वैद्यकीय तपासणीत अत्याचार झाल्याचे निष्पन्न झाले आहे.

तात्काळ अटक; जलदगती न्यायालयात खटला चालविण्याचा प्रयत्न

या घटनेनंतर अतिरिक्त पोलीस अधीक्षक निलेश मोरे यांनी स्वतः तपासाची सूत्रे हाती घेत आरोपीला तत्काळ ताब्यात घेतले. त्यांनी सांगितले की, या प्रकरणात कोणतीही हयगय केली जाणार नाही. आरोपीला कठोर शिक्षा व्हावी यासाठी पुराव्यांची काटेकोर मांडणी केली जाईल. तसेच हा खटला जलदगती न्यायालयात चालविण्यासंदर्भात जिल्हाधिकाऱ्यांशी चर्चा करण्यात आली असून, पोलीस महानिरीक्षक आणि जिल्हा पोलीस अधीक्षक यांच्या मार्गदर्शनाखाली तपास अधिक वेगाने सुरू आहे. विशेष तपास पथकाचीही नियुक्ती करण्यात आली आहे.

आरोपीची प्रकृती बिघडल्याने त्याला पुढील उपचारासाठी नागपूर येथे हलविण्यात आल्याची माहिती आहे.

उपस्थित झालेले गंभीर प्रश्न

या घटनेने अनेक मूलभूत प्रश्न पुन्हा ऐरणीवर आले आहेत—

• दोन गंभीर गुन्हे दाखल असलेला आरोपी जामिनावर बाहेर कसा आला?
• अशा स्वरूपाच्या आरोपींवर अधिक कठोर कायदेशीर निर्बंधांची गरज नाही का?
• अंगणवाडीचे शौचालय मुख्य इमारतीपासून रस्ता ओलांडून का आहे? बालसुरक्षेच्या दृष्टीने ही गंभीर त्रुटी नाही का?
• अंगणवाडी परिसरात मुलांवर सतत देखरेख ठेवण्यासाठी पुरेशी व्यवस्था होती का?
• लहान मुलांच्या सुरक्षेबाबत स्थानिक प्रशासन आणि संबंधित विभागांनी कोणते प्रतिबंधात्मक उपाय केले होते?

भंडारा बंदचे आवाहन; शहरात कडेकोट बंदोबस्त

या संतापजनक घटनेच्या निषेधार्थ विविध सामाजिक संघटनांनी भंडारा बंदचे आवाहन केले आहे. कोणताही अनुचित प्रकार घडू नये म्हणून शहरात मोठा पोलीस बंदोबस्त तैनात करण्यात आला आहे. नागरिकांमध्ये तीव्र संतापाचे वातावरण असून, आरोपीला फाशीची शिक्षा देण्याची मागणी जोर धरत आहे.