जिद्द, मैत्री आणि परिश्रमाचा सुवर्ण संगम; आयुष व मधुर यांचे सीए फायनलमध्ये पहिल्याच प्रयत्नात घवघवीत यश

चिखलीच्या दोन जिवलग मित्रांनी चार्टर्ड अकाउंटंट परीक्षेत मिळविले उल्लेखनीय यश; शहराच्या शिरपेचात मानाचा तुरा

चिखली (CA Final Result) : चिखली येथील दोन जिवलग वर्गमित्र आयुष अनिता सदाशिव देशमुख आणि मधुर सुषमा शैलेश भांगडिया यांनी चार्टर्ड अकाउंटंट (सीए) अंतिम परीक्षेत पहिल्याच प्रयत्नात उल्लेखनीय यश संपादन करून चिखली शहराच्या शिरपेचात मानाचा तुरा खोवला आहे. कठोर परिश्रम, सातत्यपूर्ण अभ्यास, दृढ इच्छाशक्ती आणि योग्य मार्गदर्शन यांच्या बळावर दोघांनीही हे यश मिळवून आपल्या कुटुंबासह संपूर्ण शहराचा गौरव वाढविला आहे.

विशेष म्हणजे, आयुषने मराठी माध्यमाच्या शाळेत तर मधुरने इंग्रजी माध्यमाच्या शाळेत शिक्षण घेतले. दहावीपर्यंत वेगवेगळ्या माध्यमातून शिक्षण घेतल्यानंतरही त्यांच्या मैत्रीचा धागा कायम राहिला. दहावीनंतर दोघांनी अकोला येथे एकत्रितपणे सीए फाउंडेशन व इंटरचे मार्गदर्शन घेतले. त्यानंतर पुणे येथे पुढील सीए अभ्यासक्रमासाठी प्रवेश घेऊन अथक परिश्रमाच्या जोरावर दोघांनीही सीए फायनल परीक्षेत पहिल्याच प्रयत्नात यश संपादन केले.

या यशामुळे दोघांवर अभिनंदनाचा वर्षाव होत असून, त्यांच्या यशाने चिखली शहराच्या नावलौकिकात आणखी भर पडली आहे.