अपघाताच्या आड हत्या कटाचा संशय; बच्चू कडू अडचणीत

अमरावती (Bacchu Kadu Case) : अमरावती जिल्ह्यातील राजकीय वर्तुळात खळबळ उडवणारी एक गंभीर बाब समोर आली आहे. प्रहार संघटनेचे नेते आणि माजी मंत्री बच्चू कडू यांच्यावर अपघाताचा बनाव करून एका व्यक्तीच्या हत्येचा कट रचल्याचा आरोप करण्यात आला असून या प्रकरणी पोलिसांनी गुन्हा नोंदवला आहे.

प्रकरण नेमकं काय?

अचलपूर मतदारसंघातील भाजप आमदार प्रवीण तायडे यांचे भाऊ अभिजित तायडे (वय ४०) यांनी पोलिसांकडे तक्रार दाखल केली आहे. या तक्रारीत, आपल्याविरुद्ध अपघात घडवून जीव घेण्याचा कट रचण्यात आल्याचा आरोप करण्यात आला आहे. या कथित कटात बच्चू कडू यांच्यासह शुभम उर्फ ‘गोलू’ माहुरे यांचा सहभाग असल्याचेही नमूद करण्यात आले आहे.

कॉल रेकॉर्डिंगमुळे वाढला संशय

तक्रारदारांनी दिलेल्या माहितीनुसार, या कटासंदर्भात काही मोबाईल संभाषणांचे रेकॉर्डिंग त्यांच्याकडे असल्याचा दावा करण्यात आला आहे. हे रेकॉर्डिंग पेनड्राईव्हच्या स्वरूपात पोलिसांकडे जमा करण्यात आले असून त्यामध्ये संबंधित व्यक्तींमधील संभाषण असल्याचे सांगितले जात आहे. या ऑडिओ पुराव्यामुळे प्रकरण अधिकच गंभीर झाले आहे.

गुन्हा दाखल, तपास सुरू

अमरावती ग्रामीण पोलिसांनी चांदूर बाजार पोलीस ठाण्यात बच्चू कडू आणि गोलू माहुरे यांच्याविरुद्ध भारतीय न्याय संहितेच्या (BNS) कलम ५५, ५८ आणि ६१ अंतर्गत गुन्हा नोंदवला आहे. सादर करण्यात आलेले ऑडिओ पुरावे न्यायवैद्यकीय तपासणीसाठी प्रयोगशाळेकडे पाठविण्यात आले आहेत.

पुढील घडामोडींवर नजर

या प्रकरणात आणखी काही धक्कादायक माहिती पुढे येण्याची शक्यता पोलिसांकडून व्यक्त केली जात आहे. सध्या चांदूर बाजार पोलीस या प्रकरणाचा सखोल तपास करत असून, संबंधित व्यक्तींची चौकशी सुरू आहे.

दरम्यान, आधीच राज्यातील राजकारणात काही संवेदनशील प्रकरणांमुळे वातावरण तापलेले असताना या नव्या आरोपांमुळे राजकीय वर्तुळात चर्चेला अधिकच उधाण आले आहे.