Akola-Amla Railway: अकोला ते खंडवा जुन्या रेल्वे मार्गावर आमला खुर्द पर्यंतचा मार्ग पूर्ण झाला आहे. २३ एप्रिल रोजी यशस्वी इंजिन ट्रायल झाली, आणि लवकरच वाहतुक सुरू होईल.
लवकरच वाहतुक होणार सुरू
हिंगोली (Akola-Amla Railway) : अकोला ते खंडवा जुन्या रेल्वे मार्गावर आमला खुर्द पर्यंतचा रेल्वे मार्ग पुर्णपणे तयार झाला असुन २३ एप्रिल रोजी घेण्यात आलेली इंजिन ट्रायल यशस्वी झाली आहे. यामुळे हा जुना व जवळचा रेल्वे मार्ग लवकरच पुर्ण होईल अशी आशा व्यक्त होत आहे.
जुन्या काळापासून अजमेर हैद्राबाद रेल्वे मार्ग मेळघाटातून सुरू होता. जुने मीटरगेज लोहमार्ग बदलून ब्रॉडगेज करण्यासाठी २०१६ मध्ये हा मार्ग बंद करण्यात आला होता. मध्यंतरी केंद्रीय वन व पर्यावरण विभागाकडून परवानगी मिळत नसल्याने हे काम रखडले होते. कालांतराने ही परवानगी मिळाली व काम सुरू झाले. या अंतर्गत अकोला - अकोट हा ५६ किलोमीटर ब्रॉडगेज यापूर्वीच पुर्ण होऊन कार्यरत झाला आहे. यापुढे अकोट ते आमला खुर्द पर्यंत ७० किलोमीटर लोहमार्ग नुकताच पुर्ण झाला आहे. २३ एप्रिल रोजी या मार्गावर इंजिन ट्रायल घेण्यात आली आहे. ही चाचणी यशस्वी ठरली आहे.
आणखी काही चाचण्या पुर्ण झाल्यानंतर अकोट पर्यंत सुरू असलेली रेल्वे वाहतुक आमला खुर्द पर्यंत होऊ शकेल. दुसर्या बाजूने सुरू असलेले काम महू रेल्वेस्थानका पर्यंत पुर्ण झाले आहे. मधे ४८ किलोमीटरचे काम सध्या सुरू आहे. या मार्गावरील ६५० मीटरचा सर्वात मोठा बोगदा तयार होणार आहे. हे काम पूर्ण झाल्यावर अकोला - खंडवा दरम्यान प्रवास कमी होणार आहे. सध्या अकोला येथून खंडवाकडे जाणार्या रेल्वे गाड्या भुसावळ - बुर्हाणपुर मार्गे जात असल्यााने अधिकचा वेळ लागत आहे, भविष्यात तो कमी होऊन उत्तर भारत व राजस्थानकडे जाणार्या गाड्यांचा प्रवास आणखी कमी होणार आहे.