डॉलर 100 रुपयांवर गेला तर मोदींचा सत्कार करणार!

माजी राज्यमंत्री सुबोध सावजी यांचे पंतप्रधानांना उपरोधिक पत्र चर्चेत

नवी दिल्ली/ मुंबई (100 Rs Per Dollar) : देशातील वाढती महागाई, घसरता रुपया आणि केंद्र सरकारच्या आर्थिक धोरणांवरून विरोधकांनी पुन्हा एकदा सरकारवर निशाणा साधला आहे. याच पार्श्वभूमीवर महाराष्ट्राचे माजी राज्यमंत्री सुबोध सावजी (Subodh Sawji) यांनी पंतप्रधान Narendra Modi यांना लिहिलेल्या उपरोधिक पत्राची सध्या राजकीय वर्तुळात जोरदार चर्चा रंगली आहे. “ज्या दिवशी एका डॉलरची किंमत 100 रुपये (100 Rs Per Dollar) होईल, त्या दिवशी आम्ही दिल्लीत येऊन आपला स्वखर्चाने भव्य सत्कार करू,” अशी खोचक मागणी सावजी यांनी पत्रातून केली आहे. यासाठी वेळ आणि तारीख द्यावी, अशी विनंतीही त्यांनी पंतप्रधानांकडे केली आहे.

सुबोध सावजी (Subodh Savaji) यांनी पत्रात केंद्र सरकारच्या आर्थिक धोरणांवर टीका करताना म्हटले आहे की, “भारताच्या अर्थव्यवस्थेत डॉलर 100 रुपयांवर (100 Rs Per Dollar) पोहोचणे हा दिवस सुवर्ण अक्षरांनी लिहून ठेवण्यासारखा असेल. आपल्या ‘विश्वगुरू’ नेतृत्वाखाली हा बहुमान देशाला मिळणार असल्याचे आता निश्चित झाले आहे.” याचबरोबर त्यांनी भाजपच्या राजकीय भूमिकेवरही टीका केली आहे. “देशात जातीयवाद, धर्मवाद आणि जुमलेबाजीच्या आधारावर सरकारे आणली जात आहेत, याचाही देशवासियांना अभिमान आहे,” असा उपरोधिक टोला त्यांनी लगावला. 

पत्रात पुढे सावजी (Subodh Savaji) यांनी नमूद केले की, “जे काम 70 वर्षांत काँग्रेसला करता आले नाही, ते तुमच्या कार्यकाळात पूर्ण होत आहे. डॉलर 100 रुपयांवर (100 Rs Per Dollar) पोहोचल्यावर आम्ही आपल्या पदाला साजेसा जाहीर सत्कार दिल्लीत येऊन करू.” या पत्रामुळे राजकीय वातावरण पुन्हा तापले असून, सोशल मीडियावरही याची जोरदार चर्चा सुरू आहे. विरोधकांकडून केंद्र सरकारच्या आर्थिक धोरणांवर टीका होत असताना भाजपकडून यावर काय प्रतिक्रिया येते, याकडे सर्वांचे लक्ष लागले आहे.