जालना-पुलगाव राष्ट्रीय महामार्गाच्या चौपदरीकरणाला गती द्या; केंद्रीय मंत्री नितीन गडकरींकडे MLA मनोज कायंदे यांची मागणी

सिंदखेड राजा मतदारसंघातील विविध रस्ते व पुलांच्या कामांसाठी भरीव निधी देण्याची गडकरींची ग्वाही

सिंदखेड राजा (MLA Manoj Kayande) : सिंदखेड राजा विधानसभा मतदारसंघातील पायाभूत सुविधांचा दर्जा उंचावण्यासाठी आणि प्रलंबित विकासकामांना गती मिळण्यासाठी केंद्रीय रस्ते वाहतूक व महामार्ग मंत्री मा. नितीनजी गडकरी साहेब यांची आमदार मनोज कायंदे (MLA Manoj Kayande) नवी दिल्ली येथे सदिच्छा भेट घेऊन विविध मागण्यांचे निवेदन देण्यात आले.

या भेटीदरम्यान प्रामुख्याने जालना–पुलगाव राष्ट्रीय महामार्गाच्या चौपदरीकरणाच्या कामाला तातडीने गती देण्यात यावी, अशी आग्रही मागणी करण्यात आली. यासोबतच सिंदखेड राजा विधानसभा मतदारसंघातील महत्त्वाचे ग्रामीण व शहरी रस्ते, पूल आणि पुलांच्या रुंदीकरणाच्या नवीन विकासकामांना मंजुरी देऊन निधी उपलब्ध करून देण्याबाबत सविस्तर चर्चा झाली.

मातृतीर्थ सिंदखेड राजा मतदारसंघाच्या सर्वांगीण विकासाच्या दृष्टीने रस्ते कनेक्टिव्हिटी अत्यंत महत्त्वाची असून, पायाभूत सुविधा भक्कम करण्यासाठी शासन स्तरावर सातत्याने पाठपुरावा सुरू आहे. या चर्चेदरम्यान केंद्रीय मंत्री मा. नितीनजी गडकरी यांनी सिंदखेड राजा मतदारसंघातील सर्व प्रलंबित व नवीन विकासकामांबाबत अत्यंत सकारात्मक भूमिका दर्शवली. तसेच आवश्यक असणारा भरीव निधी टप्प्याटप्प्याने उपलब्ध करून देऊन पूर्ण सहकार्य करण्याची ग्वाही यावेळी दिली. या पुढाकारामुळे मतदारसंघातील वाहतूक व्यवस्था अधिक सक्षम होण्यास मदत होणार असून, नागरिकांमधून समाधान व्यक्त केले जात आहे. मतदारसंघाच्या विकासासाठी असाच पाठपुरावा यापुढेही अविरतपणे सुरू राहील, असा विश्वास व्यक्त करण्यात आला.