होमिओपॅथी डॉक्टरांना ॲलोपॅथीची परवानगी; सरकारच्या GR विरोधात राज्यभर डॉक्टरांचा २४ तासांचा संप

CCMP कोर्सधारकांना MMC नोंदणीनंतर ॲलोपॅथी औषधे लिहिण्याचा निर्णय; IMA, MARD आणि अन्य वैद्यकीय संघटनांचा तीव्र विरोध

मॉडर्न फार्मकोलॉजी (CCMP) प्रमाणपत्र अभ्यासक्रम पूर्ण केलेल्या होमिओपॅथी डॉक्टरांना महाराष्ट्र मेडिकल कौन्सिल (MMC) मध्ये नोंदणी करून ॲलोपॅथी औषधे देण्याची परवानगी देणारा शासन निर्णय (GR) राज्य सरकारने जारी केला आहे. या निर्णयाला राज्यभरातील ॲलोपॅथिक (MBBS/MD) डॉक्टरांनी तीव्र विरोध दर्शवत २४ तासांच्या कामबंद आंदोलनाची घोषणा केली आहे.

सरकारने हा निर्णय तातडीने मागे घ्यावा, अन्यथा आंदोलन अधिक तीव्र करण्यात येईल, असा इशाराही डॉक्टरांनी दिला आहे. या पार्श्वभूमीवर नांदेड, नागपूर, पुणे आणि मुंबईसह राज्यातील विविध शहरांमध्ये डॉक्टरांनी कामबंद आंदोलन करत निषेध व्यक्त केला.

इंडियन मेडिकल असोसिएशन (IMA) तसेच विविध वैद्यकीय संघटनांच्या मते, केवळ एक वर्षाचा CCMP अभ्यासक्रम पूर्ण केल्यानंतर ॲलोपॅथी उपचारांची परवानगी देणे योग्य नाही. पाच ते सहा वर्षांचे कठोर वैद्यकीय शिक्षण पूर्ण केलेल्या MBBS आणि MD डॉक्टरांवर हा अन्याय असल्याचा दावा संघटनांनी केला आहे. तसेच या निर्णयामुळे रुग्णांच्या सुरक्षिततेवर परिणाम होण्याची शक्यता असल्याने शासनाने GR मागे घ्यावा, अशी त्यांची मागणी आहे.

नागपुरात सरकारच्या निर्णयाविरोधात डॉक्टरांनी आक्रमक भूमिका घेतली. इंडियन मेडिकल असोसिएशन (IMA) आणि इतर वैद्यकीय संघटनांच्या संयुक्त विद्यमाने काळ्या फिती लावून निषेध नोंदवण्यात आला. नांदेडमध्येही डॉक्टर रस्त्यावर उतरले असून शासनाच्या निर्णयाविरोधात आंदोलन करण्यात आले.

IMA ने दिलेल्या २४ तासांच्या कामबंद आंदोलनाला महाराष्ट्र मार्ड (MARD), एएसएमआय (ASMI) तसेच इतर वैद्यकीय संघटनांनीही पाठिंबा जाहीर केला आहे. त्यामुळे या निर्णयावरून राज्यभरातील वैद्यकीय क्षेत्रात असंतोषाचे वातावरण निर्माण झाले आहे.