धर्मेंद्र प्रधानांची लोकसभा अध्यक्ष ओम बिर्ला यांच्याशी भेट;नीट वादावर सरकारची हालचाल?

नवी दिल्ली : नीट (NEET) पेपरफुटी प्रकरणावरून सुरू असलेल्या राजकीय घडामोडींना बुधवारी नवे वळण मिळाले आहे. केंद्रीय शिक्षणमंत्री धर्मेंद्र प्रधान यांनी लोकसभा अध्यक्ष ओम बिर्ला यांची भेट घेतली असून, दोघांमध्ये सुमारे दहा मिनिटे चर्चा झाल्याची माहिती समोर आली आहे. या भेटीनंतर सरकारची पुढील भूमिका काय असेल, याकडे राजकीय वर्तुळाचे लक्ष लागले आहे.

नीट पेपरफुटी प्रकरणावरून विरोधकांनी संसदेच्या पावसाळी अधिवेशनात शिक्षणमंत्री धर्मेंद्र प्रधान यांच्या राजीनाम्याची मागणी लावून धरली आहे. त्याचवेळी, त्यांच्या राजीनाम्यासाठी सीजेपीकडून आंदोलन सुरू असून या आंदोलनाला विरोधी पक्षांनीही पाठिंबा दिला आहे.

विरोधकांच्या सातत्यपूर्ण गदारोळामुळे लोकसभा आणि राज्यसभा या दोन्ही सभागृहांचे कामकाज मागील दोन दिवसांपासून वारंवार तहकूब करावे लागत आहे. त्यामुळे संसदेचे कामकाज सुरळीतपणे पार पडू शकलेले नाही.

दरम्यान, संसदीय कामकाज मंत्री किरण रिजिजू यांनी लोकसभेत सरकार नीट पेपरफुटी प्रकरणावर चर्चा करण्यास तयार असल्याचे स्पष्ट केले. त्यांच्या या विधानानंतर धर्मेंद्र प्रधान यांनी लोकसभा अध्यक्ष ओम बिर्ला यांची भेट घेतल्याने या चर्चेनंतर सरकारकडून पुढील पाऊल काय उचलले जाणार, याबाबत उत्सुकता वाढली आहे.