३१ जुलैची ITR अंतिम तारीख संपली; उशिरा रिटर्न भरल्यास किती दंड?

CBDT कडून अंतिम मुदत वाढवण्यात आलेली नाही; उशिरा रिटर्न भरल्यास लेट फी, व्याज आणि रिफंडमध्ये विलंब होण्याची शक्यता

आयकर रिटर्न (ITR) भरण्यासाठी ३१ जुलै २०२६ ही निश्चित करण्यात आलेली अंतिम मुदत आता संपली आहे. या तारखेपर्यंत रिटर्न दाखल न करणाऱ्या नोकरी करणाऱ्या कर्मचारी, पेन्शनधारक, विद्यार्थी तसेच व्यवसायातून उत्पन्न नसलेल्या करदात्यांना आता बिलेटेड ITR (Belated ITR) दाखल करावा लागणार आहे. केंद्रीय प्रत्यक्ष कर मंडळाने (CBDT) यंदा ITR भरण्याची अंतिम तारीख वाढवलेली नाही.

गेल्या काही दिवसांत आयकर विभागाच्या ई-फायलिंग पोर्टलवर तांत्रिक अडचणी निर्माण झाल्याच्या तक्रारी अनेक करदात्यांनी केल्या होत्या. पोर्टल संथ गतीने सुरू असणे तसेच विविध त्रुटी (Errors) दिसून येत असल्याने अंतिम मुदत वाढवली जाईल, अशी अपेक्षा व्यक्त करण्यात येत होती. मात्र तांत्रिक अडचणी दूर झाल्यानंतरही सरकारने मुदतवाढ जाहीर केलेली नाही.

उशिरा ITR भरल्यास काय परिणाम होऊ शकतात?

३१ जुलैनंतर दाखल करण्यात येणारा आयकर रिटर्न बिलेटेड ITR म्हणून स्वीकारला जाईल. अशा वेळी करदात्यांना त्यांच्या उत्पन्नानुसार ५,००० रुपयांपर्यंत लेट फी भरावी लागू शकते. याशिवाय कराची थकबाकी असल्यास त्यावर व्याज आकारले जाऊ शकते.

उशिरा रिटर्न भरल्यामुळे टॅक्स रिफंड (Refund) मिळण्यास विलंब होण्याची शक्यता असते. तसेच काही करसवलतींचा लाभ मिळण्यातही अडचणी येऊ शकतात.

सर्व करदात्यांसाठी ३१ जुलै अंतिम मुदत नाही

३१ जुलैची अंतिम तारीख प्रत्येक करदात्यासाठी लागू होत नाही. ज्या व्यक्तींचे व्यवसायातून उत्पन्न आहे, मात्र त्यांना टॅक्स ऑडिटची आवश्यकता नाही, अशा करदात्यांसाठी ITR दाखल करण्याची अंतिम तारीख ३१ ऑगस्ट २०२६ आहे.

याशिवाय ज्या व्यावसायिक किंवा संस्थांसाठी टॅक्स ऑडिट अनिवार्य आहे, त्यांच्यासाठी ITR दाखल करण्याची अंतिम मुदत ३१ ऑक्टोबर २०२६ निश्चित करण्यात आली आहे. तर ट्रान्सफर प्रायसिंग रिपोर्ट सादर करणाऱ्या करदात्यांना ३० नोव्हेंबर २०२६ पर्यंत आयकर रिटर्न दाखल करण्याची सुविधा उपलब्ध आहे.