मौशी येथे ट्रॅक्टर पलटी होऊन चालकाचा दुर्दैवी मृत्यू; शेतात नांगरणीदरम्यान घडली दुर्घटना
कुरखेडा : कुरखेडा तालुक्यातील मौशी येथे शेतात नांगरणी करत असताना ट्रॅक्टर पलटी होऊन चालकाचा जागीच मृत्यू झाल्याची दुर्दैवी घटना शुक्रवारी (दि. १० जुलै) सायंकाळी सुमारे ४ वाजता घडली.
मिळालेल्या माहितीनुसार, विवेक जीवन कोडाप (वय ३०, रा. मौशी) हे स्वतःच्या शेतात एमएच-३५ एजी-७९५८ क्रमांकाच्या ट्रॅक्टरने नांगरणीचे काम करत होते. यावेळी ट्रॅक्टर चिखलात/खड्ड्यात अडकल्याने तो बाहेर काढण्यासाठी चालकाने लाकडी ओंडका (बंधी) लावून प्रयत्न केला. मात्र, हा प्रयत्न सुरू असतानाच ट्रॅक्टरचा तोल जाऊन तो अचानक पलटी झाला.
या अपघातात ट्रॅक्टरखाली दबून विवेक कोडाप यांचा जागीच मृत्यू झाला. घटनेची माहिती मिळताच परिसरातील नागरिकांनी घटनास्थळी धाव घेतली. या दुर्दैवी घटनेमुळे मौशी गावात शोककळा पसरली असून त्यांच्या निधनाने हळहळ व्यक्त केली जात आहे. पुढील तपास संबंधित यंत्रणेकडून सुरू आहे.