परभणी - हिंगोलीची जागा शिवसेनेला सुटण्याचे संकेत

मराठवाड्यातील आणखी एक बड्या नेत्याचे नाव चर्चेत स्थानिक स्वराज्य  संस्था विधान परिषद निवडणूक

हिंगोली (Legislative Council Elections) : विधान परिषद निवडणुकी अंतर्गत जागा वाटपाची चर्चा अंतिम टप्यात आलेली असताना परभणी - हिंगोलीची जागा शिवसेनेलाच सुटणार असल्याचे संकेत राजकीय गोटातून मिळत आहेत.  विधान परिषदेच्या निवडणूकी हिंगोली - परभणीची जागा कोणाला सुटेल या बाबत दोन आठवड्यांपासून सतत चर्चा सुरू आहे. महायुतीतील तीनही प्रमुख घटक पक्षांचे नेते आपआपल्या पध्दतीने यासाठी सक्रीय होते.

शिवसेनेत उमेदवारी मारणार्‍यांची सर्वाधिक संख्या हिंगोली जिल्ह्यातून होती तर भारतीय जनता पक्षाकडे परभणी जिल्ह्यात इच्छुकांची भलीमोठी यादी आहे. संख्या बळानुसार राष्ट्रवादी काँग्रेसचा दावा मजबूत असला तरी पक्षाकडे पाहीजे तसा उमेदवार नसल्याची चर्चा होती. राष्ट्रवादी काँग्रेसमध्ये हिंगोलीचे माजी नगराध्यक्ष दिलीप चव्हाण, परभणीचे माजी नगराध्यक्ष प्रताप देशमुख  व माजी आमदार वैâ. कुंडलिक नागरे यांचे चिरंजीव सुरेश नागरे अशी काही नावे चर्चेत आहेत.

भारतीय जनता पक्षात परभणी जिल्ह्यातील माजी मंत्री सुरेश वरपुडकर, संतोष मुरकुटे, गंगाधर बोर्डीकर अशी मोठी नावे चर्चेत आहेत. संख्या बळानुसार भारतीय जनता पक्ष दुसर्‍या क्रमांकावर असला तरी इतर पक्षांचे व काही अपक्ष नगरसेवक भारतीय जनता पक्षासोबत असल्यामुळे राष्ट्रवादी काँग्रेसच्या बरोबरीला असल्याचे भाजपनेते सांगत आहेत. आघाडीतील तिसरा घटक पक्ष शिवसेना शिंदे गटातून हिंगोली जिल्ह्यात इच्छुकांची संख्या सर्वाधिक आहे. (Legislative Council Elections) युवासेना जिल्हा प्रमुख  राम कदम व राजू चापके हे उमेदवारी मागण्यात सर्वाधिक सक्रीय दिसत आहेत. असे असले तरी मावळते आमदार विप्लव बाजोरीया यांनी मतदारांची भेटी गाठी सुध्दा सुरू केल्या आहेत. अशात सोमवारी मराठवाड्यातील शिवसेनेचा माजी मंत्री असलेल्या एका बड्या नेत्याने ही जागा शिवसेनेला निश्चित झाली असुन या नेत्याच्या मुलाला उमेदवारी मिळणार असल्याचे पक्षाच्या काही नेत्यांना सांगितल्याची चर्चा आहे. यावरून परभणी - हिंगोलीची जागा शिवसेनेला सुटण्याची चिन्हे अधिक असल्याचा अंदाज बांधला जात आहे.  दुसरीकडे महाविकास आघाडीतर्फे शिवसेना उबाठाचे परभणी जिल्ह्यातील नेते डॉ. विवेक नावंदर यांचे नाव जवळपास निश्चित मानले जात आहे. महाविकास आघाडीचे संख्याबळ कमी असले तरी स्थानिकच्या मुद्यावरून दोन्ही जिल्ह्यात महायुतीच्या घटक पक्षांचाही आपल्याला छुपा पाठींबा असल्याचे डॉ. विवेक नावंदर यांचे समर्थक सांगत आहेत.