चाकूने भोसकून रोख रक्कम लुटली; नानलपेठ पोलिसांत गुन्हा दाखल

परभणी (Robbery Case) : शहरातील जम्मू कॉलनी परिसरात चाकूचा धाक दाखवत दुचाकीस्वाराला भोसकून रोख रक्कम लुटल्याची धक्कादायक घटना घडली आहे. ही घटना १३ मे रोजी सायंकाळी साडेसहाच्या सुमारास घडली असून, या प्रकरणी १५ मे रोजी नानलपेठ पोलीस ठाण्यात गुन्हा दाखल करण्यात आला आहे.

याबाबत शेख मोहसीन यांनी तक्रार दिली आहे. फिर्यादी हे दुचाकीवरून जात असताना त्यांना ओळखीतील शेख आसेफ शेख महेबूब हा दिसला. त्याने हात दाखवून दुचाकी थांबवली आणि गाडीवर बसला. त्यानंतर “तुझ्याजवळ किती पैसे आहेत, ते दे” अशी मागणी त्याने केली. मात्र, पैसे देण्यास नकार दिल्यावर त्याने दुचाकी चालकाच्या पाठीत चाकूने भोसकले.

या हल्ल्यानंतर आरोपीने बळजबरीने साडेसहा हजार रुपयांची रोकड काढून घेतली. दरम्यान, घटनास्थळी उपस्थित असलेल्या एका व्यक्तीने मध्यस्थी करत परिस्थिती नियंत्रणात आणण्याचा प्रयत्न केला. जखमी शेख मोहसीन यांना तातडीने उपचारासाठी रुग्णालयात दाखल करण्यात आले.

उपचारादरम्यान दिलेल्या तक्रारीवरून नानलपेठ पोलिसांत गुन्हा दाखल करण्यात आला असून, पोलीस या प्रकरणाचा पुढील तपास करत आहेत.