'भाजपला सत्तेचा माज आलाय का?' राज ठाकरेंनी फडणवीसांना लिहिलं खुलं पत्र

मुंबई (Open Letter) : महाराष्ट्र नवनिर्माण सेनेचे अध्यक्ष राज ठाकरे यांनी राज्याचे उपमुख्यमंत्री देवेंद्र फडणवीस यांना उद्देशून एक जाहीर पत्र लिहित सत्ताधारी भाजपच्या काही नेत्यांच्या वर्तनावर, वक्तव्यांवर आणि सरकारच्या भूमिकेवर तीव्र शब्दांत टीका केली आहे. राज्यातील राजकीय संस्कृती दिवसेंदिवस खालावत असल्याची चिंता व्यक्त करत त्यांनी, चुकीची कृत्ये करणाऱ्यांना संरक्षण देण्याऐवजी त्यांच्यावर कठोर कारवाई करण्याची गरज अधोरेखित केली आहे. स्वकीयांच्या चुकांकडे दुर्लक्ष केल्याने सरकारची विश्वासार्हता कमी होत असून महाराष्ट्राची प्रतिमाही मलिन होत असल्याचा गंभीर आरोप त्यांनी या पत्रातून केला आहे.

राज ठाकरे यांनी आपल्या पत्रात सत्तेच्या गैरवापराचा मुद्दा उपस्थित करत "Power Corrupts..." या प्रसिद्ध उक्तीचा संदर्भ दिला आहे. सत्ता मिळाल्यानंतर काही लोकांची वागणूक बदलते आणि त्यांना कोणत्याही गोष्टीची भीती राहत नाही, असे नमूद करत त्यांनी अशा प्रवृत्तीला वेळीच आळा घालण्याची जबाबदारी सरकारची असल्याचे म्हटले आहे. चुकीची वर्तणूक करणाऱ्यांना पाठीशी घालण्याऐवजी त्यांच्यावर कठोर शासन झाले पाहिजे, अशी थेट मागणी त्यांनी देवेंद्र फडणवीस यांच्याकडे केली आहे.

राज ठाकरे यांनी पत्रातून भाजपच्या काही नेत्यांच्या वाढत्या असंवेदनशीलतेवरही थेट बोट ठेवले आहे. "भाजपला माज आला आहे... आणि तो संसर्ग आता आपल्या राज्यापर्यंत पसरलाय का?" असा थेट सवाल उपस्थित करत त्यांनी सत्ताधाऱ्यांच्या वागणुकीवर तीव्र नाराजी व्यक्त केली आहे. राजकीय पदावर असलेल्या व्यक्तींनी समाजासमोर जबाबदारीने वागणे अपेक्षित असताना काही नेत्यांची वक्तव्ये आणि कृती याउलट चित्र निर्माण करत असल्याचे त्यांनी म्हटले आहे.

पत्रात एका आमदाराच्या वर्तनाचा उल्लेख करत राज ठाकरे यांनी उपमुख्यमंत्री देवेंद्र फडणवीस यांच्या भूमिकेवरही प्रश्न उपस्थित केला आहे. "तुमचा आमदार लोकांच्या मृत्यूवर फिदीफिदी हसतो आणि तुम्ही अवाक्षरही बोलत नाही," अशा शब्दांत त्यांनी सरकारच्या मौनावर टीका केली आहे. अशा गंभीर घटनांमध्ये सरकारने स्पष्ट भूमिका घेत जबाबदार व्यक्तींना जाब विचारला पाहिजे, अन्यथा जनतेत चुकीचा संदेश जातो, असे त्यांनी नमूद केले आहे.

राज ठाकरे यांनी आपल्या पत्रात केवळ एका घटनेवर भाष्य न करता राज्यातील एकूणच राजकीय वातावरणाबद्दल चिंता व्यक्त केली आहे. सार्वजनिक जीवनात शिष्टाचार, संवेदनशीलता आणि जबाबदारी या मूल्यांचा अभाव जाणवत असल्याचे सांगत त्यांनी सत्ताधाऱ्यांनी आत्मपरीक्षण करण्याची गरज असल्याचे म्हटले आहे. सत्तेचा वापर लोकहितासाठी व्हावा, व्यक्ती किंवा पक्षाचे संरक्षण करण्यासाठी नव्हे, असेही त्यांनी स्पष्ट केले.

या पत्रामुळे राज्याच्या राजकीय वर्तुळात मोठी चर्चा सुरू झाली असून विरोधकांकडूनही यावर विविध प्रतिक्रिया उमटण्याची शक्यता व्यक्त केली जात आहे. दुसरीकडे, राज ठाकरे यांनी उपस्थित केलेल्या मुद्द्यांवर उपमुख्यमंत्री देवेंद्र फडणवीस किंवा भाजपकडून काय प्रतिक्रिया येते, याकडे सर्वांचे लक्ष लागले आहे. आगामी काळात या पत्राचे राजकीय पडसाद उमटण्याची शक्यता वर्तवली जात आहे. राज ठाकरेंचं पत्र जसेच्या तसे, पाहा नेमकं काय म्हणाले...?

प्रतिश्री. देवेंद्र फडणवीस,भारतीय जनता पक्षाच्या केंद्रातील लोकांना सत्तेचा माज आला आहे, हे पूर्व , पश्चिम , उत्तर , दक्षिण भारतातील लोकं सर्रास बोलत आहेत. केंद्रातील लोकं वाट्टेल तसे वागत आहेत याचा राग लोकांच्या मनात होता आणि आहेच. पण हा संसर्ग आता आपल्या राज्यापर्यंत पसरला…