नारायणा ई-टेक्नो इंग्रजी शाळेला आकारलेला ३३ लाख ६० हजार रुपयांचा दंड वसूल करण्याची मागणी

समाजसेवक मुनीर खान पठाण यांचे जिल्हा परिषद मुख्यकार्यकारी अधिकारी विवेक गायकवाड यांना निवेदन

हिंगोली : हिंगोली शहरातील नारायणा ई-टेक्नो इंग्रजी शाळेला आकारण्यात आलेला ३३ लाख ६० हजार रुपयांचा दंड तातडीने वसूल करण्यात यावा, या मागणीसाठी समाजसेवक मुनीर खान पठाण यांनी जिल्हा परिषदेचे मुख्यकार्यकारी अधिकारी विवेक गायकवाड यांना निवेदन सादर केले आहे.

या संदर्भात आरोग्यदूत तथा समाजसेवक मुनीर खान पठाण यांनी १६ जुलै रोजी दिलेल्या निवेदनात नमूद केले आहे की, सन २०२४ मध्ये हिंगोली शहरात नारायणा ई-टेक्नो इंग्रजी शाळा सुरू करण्यात आली. संबंधित शाळेकडे यू-डायस (U-DISE) क्रमांक नसल्यामुळे या प्रकरणी जिल्हाधिकारी, मुख्यकार्यकारी अधिकारी आणि शिक्षणाधिकारी यांच्याकडे वारंवार तक्रारी करण्यात आल्या होत्या.

सतत तक्रारी प्राप्त झाल्यानंतर शिक्षण विभागाने शाळेला नोटीस बजावली होती. त्यानंतरही शाळा सुरूच ठेवण्यात आल्याने १९ ऑगस्ट रोजी शाळेला ३३ लाख ६० हजार रुपयांचा दंड आकारण्यात आला. तसेच जिल्हाधिकाऱ्यांच्या आदेशानुसार तत्कालीन शिक्षणाधिकाऱ्यांनी शाळेच्या प्रवेशद्वाराला सील ठोकले होते.

मात्र, त्यानंतर ११ सप्टेंबर रोजी शिक्षण विभागाने संबंधित शाळेला ३३ लाख ६० हजार रुपयांचा दंड वसूल न करताच मान्यता दिली, असा आरोप निवेदनात करण्यात आला आहे.

दंडाची रक्कम वसूल न करता शाळेला मान्यता कशी देण्यात आली, याची चौकशी करून ३३ लाख ६० हजार रुपयांचा दंड वसूल करण्यात यावा, अशी मागणी समाजसेवक मुनीर खान पठाण यांनी जिल्हा परिषद मुख्यकार्यकारी अधिकारी विवेक गायकवाड यांच्याकडे केली आहे.