हिंगोलीत नगरपालिकेची तत्परता : शिवशक्ती नगरमधील तुंबलेली गटार मोकळी, नागरिकांत समाधान

हिंगोली (Municipal Action) : शहरातील शिवशक्ती नगर परिसरात गेल्या काही दिवसांपासून भूमिगत गटारीतील पाणी तुंबल्याने रस्त्यावर घाण पाणी वाहत होते. या समस्येमुळे नागरिकांना दुर्गंधी व आरोग्याच्या समस्येला सामोरे जावे लागत होते. नागरिकांची ही गैरसोय लक्षात घेऊन प्रभाग क्रमांक 9 चे नगरसेवक तथा उपाध्यक्ष अब्दुल माबुद बागवान व चंदू लव्हाळे यांनी तातडीने पावले उचलली.

त्यांनी थेट नगराध्यक्ष सौ. रेखाताई बांगर, गटनेते श्रीराम बांगर आणि नगरपालिकेचे मुख्याधिकारी अरविंद मुंडे यांच्याशी संपर्क साधून परिस्थितीची कल्पना दिली. या तक्रारीची गंभीर दखल घेत नगरपालिका प्रशासनाने तात्काळ स्वच्छता विभागाच्या कर्मचाऱ्यांना सूचना दिल्या. आदेश मिळताच स्वच्छता विभागाचे पथक यंत्रसामुग्रीसह घटनास्थळी दाखल झाले आणि भूमिगत गटार योजनेतील तुंबलेले पाणी मोकळे करून पाण्याला वाट मोकळी करून दिली.

नगरपालिकेच्या या जलद कार्यवाहीमुळे शिवशक्ती नगरमधील रस्ते मोकळे झाले असून नागरिकांनी सुटकेचा निःश्वास टाकला आहे. प्रशासनाने दाखवलेल्या तत्परतेबद्दल तसेच स्थानिक नगरसेवकांनी नागरिकांच्या समस्येला प्राधान्य दिल्याबद्दल परिसरातील नागरिकांनी समाधान व्यक्त केले आहे. एका जबाबदार लोकप्रतिनिधी आणि जागरूक प्रशासनाच्या समन्वयातून प्रश्न सुटू शकतो याचे हे उदाहरण ठरले आहे.