कनेरगाव नाका येथे घरफोडी; अडीच लाखाची रोकड व दागिणे पळविले..

कुटूंबीय देव दर्शनासाठी गेल्याचे संधी साधून चोरट्यांनी केली चोरी  बासंबा पोलिस ठाण्यात चोरट्यांवर गुन्हा दाखल

हिंगोली (Kanergaon Naka Burglary) : तालुक्यातील कनेरगाव नाका येथील एक कुटूंबीय देवदर्शनासाठी बाहेर गावी गेले असता चोरट्यांनी संधी साधून घरफोडी करून अडीच लाख रुपयाची रक्कम व दागिणे चोरून नेल्याने बासंबा पोलिस ठाण्यात गुन्हा दाखल करण्यात आला आहे.  याबाबत मिळालेली माहिती अशी की, हिंगोली तालुक्यातील कनेरगाव नाका येथील काळबांडे कुटूंबीय देवदर्शनासाठी मागिल काही दिवसापूर्वी बाहेरगावी गेले होते. देवदर्शन आटोपून ते गावी परतल्यानंतर त्यांना आपल्या घराच्या हॉलची खिडकी तुटलेल्या अवस्थेत दिसून आली. त्यानंतर त्यांनी घर उघडून संपूर्ण पाहणी केली असता घरातील सोन्याचे दागिणे व रोकड असा एकुण २ लाख ४९ हजार ४० रुपयाचा मुद्देमाल चोरीस गेल्याचे त्यांच्या निर्दशनास आले. त्यावरून १८ जुलैला बासंबा पोलिस ठाण्यात अंतकला दामोदर काळबांडे यांनी दिलेल्या माहितीवरून अज्ञात चोरट्यावर गुन्हा दाखल करण्यात आला. घटनास्थळी उपविभागीय पोलिस अधिकारी कुंदनकुमार वाघमारे, बासंबा ठाण्याचे सहाय्यक पोलिस निरीक्षक विकास आडे यांनी भेट देऊन माहिती घेतली. या प्रकरणाचा पुढील तपास पोलिस उपनिरीक्षक जमादार हे करीत आहेत.