अहेरीत 2025 सालचा 21 लाखांचा मुद्देमाल नष्ट

अहेरी श (Illegal Goods Destruction) : गुन्हेगारी आणि बेकायदेशीर कृत्यांवर कायद्याचा बडगा उगारत, माननीय पोलीस अधीक्षक मा.एम रमेश सर, माननीय अप्पर पोलीस अधीक्षक मा.कार्तिक मधिरा सर, उपविभागीय पोलीस अधिकारी श्री अजय कोकाटे सर यांचे मार्गदर्शनाखाली अहेरी पोलीस स्टेशनचे धडाडीचे पोलीस निरीक्षक हर्षल एकरे यांच्या थेट देखरेखीखाली आज एक मोठी कायदेशीर प्रक्रिया पार पडली. सन २०२५ मधील विविध आठ गुन्ह्यांमध्ये जप्त करण्यात आलेला, मानवी आरोग्यास घातक ठरणारा सुगंधी तंबाखू आणि अवैध बीटी बियाणांचा भलामोठा साठा आज अखेर न्यायालयाच्या आदेशानुसार 'भस्मसात' करण्यात आला.

कायद्याच्या चौकटीत राहून, माननीय न्यायालयाच्या स्पष्ट निर्देशानुसार आज दोन पंचांच्या उपस्थितीत ही नष्टीकरण मोहीम अत्यंत पारदर्शकतेने राबवण्यात आली. यामध्ये समाजाला व्यसनाच्या खाईत लोटणारा ११ लाख ९० हजार १८० रुपये किमतीचा सुगंधी तंबाखू आणि शेतकऱ्यांची फसवणूक करणारा ९ लाख ६२ हजार ९६२ रुपये किमतीचा अवैध बीटी बियाणांचा साठा, असा एकूण २१ लाख ५३ हजार १४२ रुपयांचा जप्त केलेला मुद्देमाल कायदेशीररीत्या नष्ट करून त्याचे अस्तित्व संपविण्यात आले.

पोलीस निरीक्षक हर्षल एकरे यांच्या या धडक आणि पारदर्शक कृतीमुळे अवैध धंदेवाल्यांचे धाबे दणाणले असून, अहेरी पोलिसांच्या या कारवाईचे सर्वत्र कौतुक होत आहे.