गुप्तधनासाठी बेकायदेशीर खोदकाम; पाच ते सहा जण पोलिसांच्या ताब्यात

शहरातील काही प्रतिष्ठितांचा हात असल्याची चर्चा

वाशिम (Illegal Digging) : जुन्या वाशिम शहरातील रमेश टॉकीज परिसरात शहर पोलीस स्टेशनच्या गुन्हे अन्वेषण पथकाने सायंकाळी सहा वाजता अचानक कारवाई करत पाच ते सहा जणांना ताब्यात घेतले. गुप्तधनासाठी बेकायदेशीरपणे खोदकाम करण्यात येत असल्याच्या संशयावरून ही कारवाई करण्यात आल्याची शहरात जोरदार चर्चा आहे.

मिळालेल्या माहितीनुसार, शहरातील बंद असलेल्या रमेश टॉकीज परिसरात काही दिवसांपासून गुप्तधनाच्या शोधासाठी खोदकाम सुरू असल्याच्या चर्चा सुरू होत्या. या पार्श्वभूमीवर शहर पोलीस स्टेशनच्या डीबी पथकाने सायंकाळी सहा वाजताच्या सुमारास अचानक धाड टाकली.

या कारवाईदरम्यान पाच ते सहा जणांना ताब्यात घेण्यात आले असून, त्यांची चौकशी सुरू असल्याची माहिती आहे. विशेष म्हणजे, या प्रकरणात शहरातील काही प्रतिष्ठित व्यक्तींचा देखील सहभाग असल्याची चर्चा रंगली आहे.

दरम्यान, या संदर्भात पोलिसांकडून अद्याप अधिकृत माहिती जाहीर करण्यात आलेली नाही. रात्री उशिरापर्यंत ताब्यात घेतलेल्या व्यक्तींची चौकशी सुरू होती.

या कारवाईमुळे शहरात विविध चर्चांना उधाण आले असून, पुढील कारवाईकडे नागरिकांचे लक्ष लागले आहे.