रिसोड तालुक्यातील मांडवा येथील अल्पभूधारक शेतकऱ्याची गळफास घेऊन आत्महत्या

रिसोड (Farmer Suicide) : तालुक्यातील मांडवा येथील अल्पभूधारक शेतकरी रोहीदास वामन जाधव (वय 65) यांनी आज सकाळी राहत्या घरातील टिनपत्राखालील लोखंडी अँगलला दोरीने गळफास घेऊन आत्महत्या केल्याची घटना उघडकीस आली आहे. घटनास्थळाचा पुढील तपास रिसोड पोलिस करीत आहेत.

मांडवा येथील रोहीदास वामन जाधव हे अल्पभूधारक शेतकरी असून शेतीला पूरक व्यवसाय म्हणून शेळीपालन करीत होते. आत्महत्याग्रस्त जाधव यांच्या पश्चात पत्नी, तीन मुले, एक मुलगी असा मोठा परिवार आहे.

सदर घटना सोमवार, दि. 18 मे रोजी सकाळी सुमारे 7 वाजण्याच्या दरम्यान कुटुंबीयांच्या निदर्शनास आली. यानंतर घटनेची माहिती रिसोड पोलिस स्टेशनला देण्यात आली. ठाणेदार रामेश्वर चव्हाण यांच्या नेतृत्वात पोलिस निरीक्षक राजेंद्र वानखेडे व जमादार ज्ञानेश्वर बेले यांनी घटनास्थळाचा पंचनामा करून मृतदेह पुढील तपासणीसाठी ग्रामीण रुग्णालय, रिसोड येथे हलविण्यात आला.

या प्रकरणाचा पुढील तपास पोलीस उपनिरीक्षक राजेंद्र वानखेडे व जमादार ज्ञानेश्वर बेले करीत आहेत. आत्महत्याग्रस्ताच्या डोक्यावर काही कर्ज असल्याची चर्चा घटनास्थळी सुरू होती.