अंबेजोगाईत एटीएम फोडीचा प्रयत्न करणारे चोरटे परभणी पोलिसांच्या ताब्यात

स्थानिक गुन्हे शाखेची कारवाई; मानवत, पाथरी येथील आरोपींवर कारवाई

परभणी : शहरातील नवा मोंढा परिसरात झालेल्या एटीएम फोडीच्या घटनेचा तपास करत असताना परभणी स्थानिक गुन्हे शाखेच्या पथकाने अंबेजोगाई येथे झालेल्या एटीएम फोडीच्या प्रयत्नातील चार चोरट्यांना ताब्यात घेतले आहे. हे चोरटे परभणी जिल्ह्यातील मानवत व पाथरी तालुक्यातील असून, संबंधितांना पुढील तपासासाठी अंबेजोगाई शहर पोलिसांच्या ताब्यात देण्यात आले आहे.

परभणी शहरातील नवा मोंढा परिसरात असलेल्या युको बँकेचे एटीएम फोडून साडेपाच लाख रुपयांची रोकड लंपास करण्यात आली होती. या प्रकरणाचा तपास स्थानिक गुन्हे शाखेचे पथक करत आहे.

तपासादरम्यान, अंबेजोगाई शहरात २ जुलै रोजी एसबीआय बँकेचे एटीएम फोडण्याचा प्रयत्न झाल्याची माहिती समोर आली. मात्र, एटीएमचा सायरन वाजल्याने चोरट्यांनी घटनास्थळावरून पळ काढला होता. या प्रकरणातील संशयितांना परभणी स्थानिक गुन्हे शाखेच्या पथकाने ताब्यात घेतले.

तपासात गणेश बालासाहेब काळे, राजेश बाबासाहेब कांबळे, विवेक बबन धारे, मुंजाजी लक्ष्मण आरसाड (सर्व रा. कोल्हा, ता. मानवत), तसेच परमेश्वर सोनाभाऊ बनगर व विष्णू नारायण भिसे (दोघे रा. झरी, ता. पाथरी) यांचा या गुन्ह्यात सहभाग असल्याचे उघड झाले आहे.

यापैकी चार चोरट्यांना ताब्यात घेण्यात आले असून, पुढील कारवाईसाठी त्यांना अंबेजोगाई शहर पोलिसांच्या ताब्यात देण्यात आले आहे.

ही कारवाई स्थानिक गुन्हे शाखेचे पोलीस उपनिरीक्षक चंदनसिंह परिहार यांच्या मार्गदर्शनाखाली पोलीस अंमलदार केशव लटपटे, महेश कवठाळे, विलास सातपुते, रंगनाथ दुधाटे, सचिन भदर्गे, सिद्धेश्वर चाटे, नामदेव डुबे, राम पौळ, मधुकर ढवळे, विष्णू चव्हाण, गजानन क्षिरसागर, सुर्यकांत सातपुते, राहुल परसोडे, माणिक वाघ आणि दिलीप निलपत्रेवार यांच्या पथकाने केली.